Waya Gulîstan Doku, Aygul Doku dîyar kerd ke embazê Mustafa Turkay Sonel, Umut Altaş pê hesîyayo ke waya aye Mustafa Turkan Sonelî kişta û waşt ke walîyê ê demî Tuncay Sonel gure ra bêro girewtene û muhakemekerdene.
Wendekara Unîversîteya Mûnzurî ya Dêrsime ya sinifê 2. Gulîstan Doku (21), 5ê çeleyê 2020î de ameye vîndîkerdene û a roje ra heta nika tu agahî ci ra nêameya girewtene. 13ê nisane de çarçewaya cipersîyayîşê dosyaya Gulîstan Doku de 13 kesî ameyê destbendkerdene. Mîyanê destbendkerdeyan de lajê walîyê ê wextî yê şaristanî Tuncay Sonelî ê bi nameyê Mustafa Turkan Sonel, pawitoxê walî û mudirê emnîyetî yê verê zî est ê. Badê averşîyayîşanê neweyan ê ke cipersîyayîşê Gulîstan Doku de qewimîyayê, keyeyê Doku vernîya Edlîyeya Dêrsimî de eşkerayî daye çapemenî. Ferdê keyeyî û avûkatê keyeyî Alî Çîmen tewrê eşkerayî bîyê.
Waya Gulîstan Doku, Aygul Doku ke nameyê keyeyî ser o qisey kerd, derheqê hedîse de agahîyê neweyî dayê. Aygul Doku da zanayene ke embazê Mustafa Turkan Sonel ê lajê walîyê ê wextî Tuncay Sonelî, Umut Altaşî ra pê hesîyayê ke waya aye Mustafa Turkay Sonelî kişta. Aygul Doku nê agahî dayê: “Umut Altaş 2-3 reyan mi gêra, waştêne ke vajo la cesaret nêkerdêne. Dima ra şino noto ke ser o ‘Keso ke Gulîstan kişta Mustafa Turkay Sonel ê lajê Walî Tuncay Sonel o.’ nuseno. Dozgerê ê wextî zêde nê notî ser o nêvindeno. Dima ra ma şîyê ke keyeyî reyde pêvînayîş bikerê, verê ke ma ronişê ma ra vat ‘Homa rehma xo piro bikero’. Ma uca de kewtî mîyanê şik û gumanan. Heta nika kesî çîyêko winayîn nêvatbi. Ma tira vat ‘Çira ti çîyêko winayîn ma ra vanê?’ Ma serê ey de şîyê maya ey ma ra vat ‘Tekane sucê lajê mi o yo ke lajê walî reyde embazî kerda. Ma lajê xo zaf reyan hişyar kerd, ma vat o kesêko saxlem nîyo. Lajê mi bi embaz ey û sereyê ey kerd bela.”
‘Eke Umut nêbîyêne mi nameyê lajê Tuncay Sonelî nêzanayene’
Aygul Dokû îfade kerd ke Umut Altaş remayo şîyo Amerîka û wina vat: “Ma pî û maya ey ra vat, eke lajê şima remayo Amerîka lajê şima Gulîstane kişta. Înan ney qet qebul nêkerd. Dima ra hûmara Umutî daye ma, ez ey gêraya. Umut Altaş wexto ke na hedîse qewimîyaye 18 serre bi. Nêeşkayo na hedîse hewano. Nê notî berdo Baro de ronayo. Hewl dayo ke xo biresno mi. Tuncay Sonel o bilez erşawito Amerîka. Umut vat ‘Mi nêkerdo la ez do to rê hetkarî bikera, 2-3 rojî wext bidê mi.’ Umut do mi reyde qisey bikerdêne. Keyeyê Umut û kesê ke tîya de yê nêverda o qisey bikero. Dima ra ma nêeşkayê xo biresnê Umutî. Umut vano ke wexto ke Gulîstan ameye kiştene wesayît de bîyo. Wexto ke Gulîstan ameya kiştene Umut înan reyde bîyo. Eke Umut kiştox bîyêne mi ra nêvatêne, ez do hetkarîya to bikerî. Eke Umut nêbîyêne mi nameyê lajê walî Tuncay Sonelî nêzanayêne.”
Aygul Doku dîyar kerd ke verê ke waya aye bêra kiştene aye vista dame û waşt ke Tuncay Sonel bilez gure ra bêro girewtene û muhakemekerdene.
