Dêrsim de pêşengîya hunermend Zeynep Kiliçe de koroyê Perperikê Usarî yê domanan konser da qican û şarê Dêrsimî. Qomê Zaf eleqa nîşanê ci da û cinîk û kokima terba domanan bi ziwanê xo de kilamî vatî.
Mamosta û hunermend Zeynep Kiliç a ke, kulturê kirmancîye ser o Şaredarîya Dêrsimî de xebat kerdêne û bi destê qeyûmî kar ra amebî vetene, cayê xo de nêvindete û karê xo teber de da ramitene. Zeynep Kilice bi îmkananê kemîyan Dêrsim de bi nameyê Koroyê Perperikê Usarî domanî ardî pêser, cinitena tomirî û kilamê ziwanê dayîke nîşanê ci da.
Koroyê Perperikê Usarî bi tomir û vengê xoyê zelalî ziwanê dayîke de şarê Dêrsimî rê kilamê xo vatî. Domanan ra heta kokima eleqeyê de zaf rinde bîye. Konser de mesajê “Ziwanê dayîka xo, xo virî ra mekerîme” kewt vêrnîye.
Hunermend Zeynep Kiliçe kar û xebatê xo û koroyî ser ajansê ma rê qisey kerd.
‘Zonê ma zelal û delal o’
Zeynep Kiliçe muhimîya ziwanî û ramitene kultirî ser vinerte û no derheq de cî binê muhimîya cayê domanan xêz kerd û wina vat: “Ewro Domanu ra pîya kilamanê xo vanîme. Xeylê wexto ke pîya gûrîyayîme. Vazon ke domanê ma, zonê xo bizanê, kilamanê ma ra durî mekûyê. Yenê îta sonê çê de kilamanê xo vanê, birayê înû, wayê înû ke zonê ma kilamanê ma musenê. Pîyê domanû, mayê domanû vazenê ma zonê xo de, kilamû vajîme. Vazeme ke teyna Mamekîye de nê, şîme her ca de kilamanê xo vajîme. Kam ke zonê ma ser xebetîno wes û war bo.”
