Hemserekîya Konseya Rayraberdişî ya KCK’yî vat: “Ma bîyayîşê Rayberîye yê 4ê Nîsane pîroz kenê û venga herkesî danê ke 4ê Nîsane bi ronayîşê daran ke waştişê Rayber Apoyî yo, bi coşêko gird pîroz bikerê.”
KCK’yî eşkerayîya xo de vat: “Ma kewtê serrgêra 77. ya bîyayîşê Rayber Abdullah Ocalanî ke şarê ma sey bîyayîşê xo vîneno û her serre bi heyecan û sipasîye pîroz keno. Sey her serre emserr zî şarê ma, cinîyî û ciwanî amade yê ke 4ê Nîsane bi heyecanêko gird pêşwazî bikerê. Ma nê bîyayîşê manadarî Rayberîya xo, şarê xo, cinîyan, ciwanan, heme şaran û merdimîye rê pîroz kenê.”
KCK’yî vat: “Rayber Abdullah Ocalanî sere de seba şarê kurdan û cinîyan û seba heme şaran û merdimîye erjê girdî awan kerdî û bi nê erjan nameyê xo tarîxê merdimîye de nuşt. Verê hemînan şarê kurdan ke estbîyayîşê ci înkar bîyêne û jenosîdî rê ame hedefgirewtene fina bin vist, ci rê şûur, ruh û nasname qezenç kerd û kerd şarêk ke estbîyayîşê ci înkar nêbeno. 27 serrî yê esaretê Îmralî de zî eynî tewir esas girewt. Bi naye komploya tewr girde ya tarîxî û esaretê tewr giranî veng verda. Bi heweyêko azad fikr û paradîgmaya newîye xurt kerde.”
KCK’î vat: “Cinîyî zî seba Rayber Apoyî heskerdiş, sozdarîya girde zerrîya xo de kenê gird. Çike Rayber Apoyî heme tarîxî de rayberan ra zêdeyêr seba cinîyan kerd. Camêrdîya serdeste red kerde, azadîya cinîyan sey prensîbê bingeyîn ê cuye girewte xo dest.”
KCK’yî vat: “Peynîye de Rayber Apoyî dewrêk de ke Şerê 3. yê Dinya pêt beno bi ‘Vengdayîşê Haştî û Komelê Demokratîkî’ seba merdimîye modelêko çareserî yo newe û alternatîf pêşkêş kerd. Bi nê vengdayîşê tarîxî û manîfestoya ke xurt kerde, vera sîyasetê şerê hêzanê hegemonîkan ke şaran ver pê danê, bi fehmê çareserîya entegrasyona demokratîke rayîrê haştî û pîyaciwîyayîşê şaran akerd.”
KCK’yî peynîye de vat: “Newe ra ma bîyayîşê Rayberîye yê 4ê Nîsane ke seba şarê ma, cinîyan, şaran û merdimîye manadar o, pîroz kenê û venga herkesî danê ke 4ê Nîsane bi ronayîşê daran ke waştişê Rayber Apoyî yo, bi coşêko gird pîroz bikerê.”
