TJA programê çalakîyanê xo yê ke bi wesîleyê roja bîyayîşê Rayberê Şarê Kurd Abdullah Ocalanî yê 4ê Nîsane dest pêkenê, eşkera kerd. Çalakîye bi şîarê “Nika demê cinîyan o, demê azadîya Rayber Apoyî yo” 1ê nîsane de dest pêkenê.
Têgêrayîşê Cinîyan ê Azadan (TJA) programê çalakîyan û aktîvîteyanê xo ke bi wesîleyê roja bîyayîşî û azadîya Rayberê Şarê Kurd Abdullah Ocalanî do bêrê viraştene, eşkera kerd. Eşkerayîya ke Keyeyê Cemil Paşayî yê Amedî de ameye dayene, xeylê cinîyî tewrê ci bîyî. Kurdkîya eşkerayîye aktîvîsta TJA Dicle Tekik Erdem wende û tirkîya aye Hemsereka Şarsitanî ya DBP’yî ya Amedî Ruçem Vefa Elyakut wend.
TJA eşkerayîye de dîyar kerd ke azadîya Rayberê Şarê Kurd Abdullah Ocalanî tena seba şarê kurdî ney, bingeyê haştîye û seypêyî ser o seba pîyaciwîyayîşê şaranê Rojhelatê Mîyanênî zî dîyarker a. Eşkerayîye de dîyar bî ke têkoşînê azadîya cinîyan ê bi serran biisrar dewam keno û erjnayîşê Rayber Apoyî yê derheqê azadîya cinîyan û nêzdîbîyayîşê ey ê îdeolojîk-polîtîkî rayîrêko muhîm akerd.
TJA vat: “Heta ke azadîya Rayberê Şarî Abdullah Ocalanî nêro temînkerdene, haştîyêka domdare mumkîn nîya” û dîyar kerd ke seba çareserîya meseleya kurdî û qedîyayîşê rewşa şerî ya herême, Prosesê Haştîye û Komelê Demokratîkî ganî bêro awankerdene.
TJA’yî wina vengdayîş kerd: “Seba ke Prosesê Haştîye û Komelê Demokratîkî biresê serkewtişî û haştîyêka raştikêne bêro temînkerdene, veng danê ke şertê azadîya fizîkîye ya Rayberê Şarî Ocalanî lezabez bêrê temînkerdene. Nika demê pêvînayîşê Rayberîya azad o, nika demê cinîyan o. Ma bi wesîleyê roja bîyayîşê Rayberê Şarê Kurdî Abdullah Ocalanî 4ê nîsane Riha de û 19ê nîsane Gemlik de yê. Çalakîyê xo ke 1ê nîsane dest pêkenê û 19ê nîsane bi rayîrşîyayîşî resenê Gemlikî dewam kenê, bi şîarê ‘Nika demê cinîyan o û demê azadîya Rayber Ocalanî yo’ ma do waran de bibê.”
Eşkerayîye bi sloganê “Jin, jiyan, azadî” û “Bijî Serok Apo” qedîyaye.
