Dêrsim cayê jîyar û dîyaran o. Dursun Arca seba dewa xo ya verêne Garşîye zî henî vano. Pî û kalikanê ey ziwanê Kirmancîya beleke de Raya Heqî ser cemî girêdê û raye da ramitêne. “Welatê ma welatê jîyar û dîyaran o, îtîqat û kulturê xo rê wayîr vecîme.”
Dursan Arcayî 1987î ra ver weşîya xo dewa Dêrsimî Garşîye de heywanî weyekerdene ser o ramita. Nika terba keyeyê xo Dewa Erzinganî Handîsî de weşîye xo ramnenê. Raya pîy û kalanê xo îtîqatê xo ramneno û şono mîyanê talibanê xo cem girêdano.
Ewladê Ocaxa Kurêsî Pîr Dursun Arca, wextê verî ser, îtîqat û kulturî ser ajansê ma rê qisey kerd.
‘Ma saya înû ra payra vîndeme’
Pîr Dursun Arca, wina vano: “Ma ra çê Dewrêş Derî vanê. Kalikê mî, Dewrêş Dîlo yo. Verênde Qizilbel de mendîme. Pîyê mi sey bî. Tepîya şîme Mezra Dewrêşî. Ez uzade bîyane. Uzade şîme Garşîye. Ma uzade, merge çînîtêne, hêgay ramitêne, vas girze kerdêne, velg birnêne, Rencberîyen kerdêne. Zimistanê xo zaf giran bî. Zerê çêyî de new domanî bî, pêrûne pîya weşîya xo ramitêne. Dawar bî ma weye kerdêne. Zimistan ke ame, cem gîrêdêne, bavay amêne, pîlê ma tomir cînîtêne, vengê heqî dêne. Qirvanî kerdêne, nîyazî potêne, îtîqat rind bî. Pîr û talibî ameyne lewê jûminî. Weşîya ma zerê îtîqatî de bîy. Ma Kirmanckî vengê heqî dêne. Gulbangî kirmanckî dêne. Raya ma raya raştîye bîy. Kerametê pîlanê ma bî. Çîke vatêne ameyne hurende. Vatêne ya Xizirê tenge, Xizir lewe de hazir û nazir bî. Ez û birayê xo ma bînê hewreşî (çix) de mendîme, Xizirî ma xelesnayî ra. Der û cîranîyen zaf rind bîye.”
‘Îtîqat û kulture xo rê wayîr vecîyê’
Dursun Arca, qiseykerdîşê xo yê peyênî de, qalê wayîrvejîyayîşê îtîqat û kulturî ser vindert û wina vat: “Qanûnê ma, huqûqê ma cem bî. Pîlanê ma kam ke jûmînî de da pêro zereyê cemî de aşt kerdêne. Çim meseleyî mabênê şarê ma de bibîyêne cem de cirê çareyê dîyêne. Hatanû nika çîyê ke marê mendo, înûra mendo. Ma, giranîya raya xo bizanime. Jîyarê ma Ana Şerîbane bîye, Starê serê ma bîye. Ebdelezîz bî, Şerîban e û Ebdelezîz wayî û biraye jûmînî bî. Sabê Sere Gelîye bî, Koyê Qoşan bî, Pîrê Qankû, Nîsanê Pîr, pêrûne jîyar û dîyarê ma bî.
Raya xo, zon û îtîqatê xo, Pîr û talibanê xo, xo vîrra mekerê. Vengê heqî bîderê, vengê Xizir bîdêre, vengê îyê ke kerametê xo estê înû bîyarê xo vîrî, jû roje ke xo vîrra bikerê, mezgê sima de, zereyê sima de benê dûr.”
Pîr Dursun Arcayî dimayê qiseykerdişê xo ma rê temur cinit û yew deyîra vate ke ey bi xo viraşta .
