Serekwezîrê Îngîlîstanî Keîr Starmerî dîyar kerd ke welatê înan ganî seba qonaxêko demderg ê şerê mabênê Amerîka-Îsraîl û Îranî de amade bibo.
Serekwezîrê Îngîlîstanî Keîr Starmer eşkerayîyêka çapemenî de şerê mabênê Amerîka-Îsraîl û Îranî de qisey kerd. Starmerî vat ke hukmarê ey meslekê pawitişî reyde xebitîyeno ke sîstemê pawitişê hewayî bi ca bikero û hemkarê xo yê herêma kendawe bipawo. Starmerî dîyar kerd ke fikarê înan ê cidî temînkerdişê enerjî çin o la ganî heme bala înan kêmkerdişê bilez ê rewşe bibê.
‘Beno ke şer demderg bibo’
Starmerî vat ke planê înan nê bingeyî ser o yê ke no şer eşkeno demêko derg zî bidomo. Serekwezîrê Îngîlîstanî eşkera kerd ke seba erşawitişê sîstemanê pawitişê hewayî xebitîyenê û da zanayene ke sîstemê pawitişê hewayî yê menzîlê kiln Bahreyn de bi ca kerdê û nê sîstemî do Kuweyt û Erebîstanê Seûdî de zî bêrê bicakerdene. Starmerî teqez kerd ke na babete peynîya hewteyo verênî ra vejîyaya astêko muhîm û lezgînî û eşkera kerd ke ê do wezîranê xo reyde kombîyayîşêko awarte bikerê.
Starmerî 18ê adare de destûrê şuxulnayîşê qerargehanê Îngîlîstanî dabi Amerîka ke vera Îranî bişuxulno.
