Meclîsê Cinîyan yê DEM Partî ya Enqera, vera Sefîrxaneyê Îranî de cezaya îdamî ya ke Pexşan Ezîzî rê ameya dayene protesto kerd û waşt ke a bêra veradayene.
Meclîsa Cinîyan a Partîya Têdûştî û Demokrasîya Şaran (DEM Partî) ya Enqera, cezaya îdamî ya ke hetê Îranî ra rojnamegere Pexşan Ezîzî rê ameya dayene, vera Sefîrxaneyê Îranî de bi beyanatêk protesto kerd. Hemsereka DEM Partî ya Enqera Tatligul Gulî beyanat de ke tede pankartê Kurdkî û Tirkî yê “Wa îdamî Îran de bêrê vindarnayene, Azadî Pexşan Ezîzî rê” est bî, va ke rejîmê mollayanê Îranî bi dayîşê cezaya îdamî ya bêhuqûqî cinîyan hedef gêno. Gulî îfade kerd ke Îran suc keno û va: “Pexşan Ezîzî tena seba ke cinî ya, kurd a, heqê cinîyan pawena û bi nasnameyê xo ya rojnamegerî rastîyan resnena dinya, bîya hedefê nê rejîmî.”
Tatligul Gulî bale ant ke Vakur û Rojhelatê Surîye de zî hêrişê vera destkewteyanê cinîyan dewam kenê û va: “Têkoşînê azadîya cinîyan yê Rojawanî heme dinya rê îlham dana. La no xoverdayîş reyna bîyo hedefê dişmenanê xo. Endama Komela Cinîyan a Zenûbîya, hêrişanê girdîbîyayeyan ê ke vera cinîyanê Vakur û Rojhelatê Surîye de cuya xo vîndî kerd. Rîyê şerî yo tewr zalim, xo cinîyan ser o mojneno. Ma nê hêrişan tena sey tehdîdêk verba têkoşînê azadîya cinîyanê Rojawanî nê, verba têkoşînê azadîya cinîyanê heme dinya vînenê.”
Gulî waşt ke gereka cezaya îdamî ya ke Pexşan Ezîzî rê ameya dayene ca de bêra hewaneyene û vat: “Ganî cezaya îdamî ya ke Pexşan Ezîzî rê ameya dayene ca de bêra hewaneyene û nê sucê ke verba cinîyan yenê kerdene bêrê vindarnayene. Dayîşê têkoşînê seba heqanê cinîyan, waştişê seyyewbinîye û azadîye suc nîyo.”
Beyanat bi sloganan qedîya.
