Mesajê Rayberê Şarê Kurdî Abdullah Ocalanî do 21ê Adare de Newroza Amedî de bêro wendene. Yeno pawitene ke Prosesê Aştî û Komelê Demokratîk, Newroze û hedîseyanê peyênan de mesajanê muhîman bido.
Newroze çar hetanê Kurdîstan û xeylê welatanê dinya de yena pîrozkerdene. Newroza Amedî emserr zî do 21ê Adare de Meydanê Newroze de yena pîrozkerdene. Xebatê Newroze pêroyê şaristanî de dewam kenê. Yeno pawitene ke mîlyonêk ra zafêr kesî Amed de Newroze pêşwazî bikerê. Newroze de babeta ke tewr zaf yena meraqkerdene zî mesajê Rayberê Şarê Kurdî Abdullah Ocalanî yo. Ame zanayene ke mesajê Abdullah Ocalanî do Newroza Amedî de bêro wendene. Yeno texmînkerdene ke Abdullah Ocalan mesajê xo yê emserrî de bale bianco muhîmîya prosesê Aştî û Komelê Demokratîk, Newroz û hedîseyanê peyênan ê Rojhelatê Mîyanên û dinya ser o.
Newroza 2013î de Onder û Buldan mesajî wendbi
Mesajê Rayberê Şarê Kurdî Abdullah Ocalanî tewr peyên 2013î de Newroza Amedî de hetê Heyetê Îmralîyî yê ê demî Sirri Sureyya Onder û Pervîn Buldan ra amebi wendene.
