Îsraîl û DYA’yî yê saetanê nêmrojî de bombabaranê giranî kerdê. Fîloyê transferî yê Îranî, kampanê muhafizanê şorişî û xeylê kampê Besîcî ameyê bombabarankerdene û xeylê vîndîbîyayîşî canî virazîyayê. Îranî zî bi fuzeyan da tesîsê Yewîya Îmaretanê Ereb ro û netîce de veşayîşêko gird vejîya.
Şerê Îsraîl-DYA û Îranî roja 17. de bi bombabaranêko giran dewam keno. Tewr zaf hêrişê paytextê Îranî Tehran, Şîraz û Tebrîz de virazîyayê. Goreyê eşkerayîya Hêzanê Pawitişê Îsraîlî (IDF) pêlo newe yê bombabaranî de binawanîya leşkerî, ewleyî û endustrîya Îranî hedef ame girewtene. Eşkerayî de ame dîyarkerdene ke çarçewaya operasyonî astê berz de ameyo hîrakerdene û bi desan hedefî ameyê çinkerdene.
Kampê ewleyî yê Îranî veşenê
Goreyê dîmenanê ke hetê çimeyanê herême ra ameyê vilakerdene, netîceyê pirodayîşê teyaranê şerî de xeylê banî, kampî û tesîsî veşayê. Netîceyê hêrişan de Kuçeyê Zarafşan û Şahrake Xerb ê Tehranî de kamp û banê sazgehanê ewleyî û îdarî yê Îranî veşayê.
Bi dronanê întîharî 25 leşkerê Îranî kiştî
Operasyonê Tehranî de Îsraîl û DYA’yî dronê întîharî zî şuxulnayê. Netîceyê hêrişê drone de Tehran de bi seyan endamê Muhafizê Şorişî yê baxçeyê dibistanêk de hedef ameyê girewtene. Netîceyê teqayîşî de tewr tay 25 leşkerê rejîmî merdî û goreyê agahîyan xeylê muhafizî zî birîndar bîyê. IDF’yî nê dîmenî bi notî “Endamê rejîmî dibistanan bikar anê. Cayêkê endamê rejîmî bikar anê tira dûrî vinderê” weşana.
Fîloyê teyaran ê transferî ame îmhakerdene
Teyaragehê Mehrabad ê Tehranî de zî teqayîşê girdî virazîyayê û veşayîş vejîya. Verfekê IDF’yî dîmen û fotografê hêrişî pare kerdî û dîyar kerd ke teyaraya seba kar û baranê Rayberê dînî yê Îranî ameyêne şuxulnayene û fîloyê lojistîkî û transferî yê Îranî bi pêroyî îmha kerdê.
Îranî da Yewîya Îmaretanê Erebî ro
Îranî sey cewabê operasyonî hêrişê tesîsanê Lîmanê Fûjaîrah ê Yewîya Îmaretanê ereb kerd. Netîceyê hêrişanê fuzeyan de tesîsan de teqayîşê girdî virazîyayê û dima ra zî tesîsanê sotemenî de veşayîş vejîya.
Hêrişê her di hetan zî dewam kenê.
