Rojhelatê Kurdîstanî de her serre şaristananê sey Sine, Kirmaşan, Seqiz, Mahabad û tewr peynî zî Urmîye de bi milyonan kurdî bi kincanê neteweyî û govendanê xo yewrêzî xo yê Newroze danê mojnayene. La kurdê Rojhelatî emser şertanê şerî de pêşwazîya Newroze kenê.
Rejîmê Îranî her serre hewl dano pîrozbayîyanê Newroze bikero binê kontrolê xo û wazeno Newrozan zereyê salonanê girewtî de bifetisno. La cewabê şarê Rojhelatî her tim şikitişê nê qedexeyan o. Kurdê şaristanî, qeza û dewan, sînorê ke rejîm înan rê dîyar keno nas nêkenê û verê xo danê tîtikê koyan. Adirê ke tîtikê koyanê asê ser o yeno wekerdene, cewabêke zelalîye vera polîtîkayanê asîmîlasyonî yê ke bi desan serran serê nê herran de yeno rayraberdene.
Vera yewrengî rengê kurdî
Yew dîmenêko tewr bi mane yê Newrozê Rojhelatî, rîtmê rengan ê. Şaristanê sey Sine, Îlam, Seqiz, Urmîye, Kirmaşan û Mahabadî, bi mîlyonan kurdî bi kincanê kurdî herikîyayenê waranê Newrozan. Cinîyê kurdî kincanê renginan xoradanê, vera polîtîkaya çarşefan ê rejîmî vindenê. Govendê ke nê şaristanan de yenê girewtene, îşaretê yewrêzî û pêro pîya yê komelê kurdî yo.
Pawitişê ruhê kevnarî
Nê mabênî de pîrozbayîyê herêma Hewremanî û dewê tarîxî yê Palanganî balê heme dinya ancenê. Newroze îta de bi hewayêko efsûnî yeno pîrozkerdene. Bi seyan ciwanî kurdî bi meşaleyan kuçan ra ver bi tîtikê koyan şîyenê. Na zincîra adirî gilê koyan ra herikîyena, ruhê Newrozê yê kevnarî pawen o.
