Girewtişê Berê Sinorê Bajêrge yê Geverî cuya rojane û ekonomîyê hemwelatîyan ser o tesîrêko gird kerd. Badê destpêkerdişê şerê Amerîka-Îsraîlî yê vera Îranî berê sinorê Hacî Omeranî, Kapikoy û Bajêrge ameyî girewtene.
Destpêkerdişê şerê Amerîka-Îsraîlî yê vera Îranî ra dima berê sinorê Hacî Omeranî, Kapikoy û Bajêrge ameyî girewtene. Girewtişê Berê Sinorê Bajêrge yê Geverî cuya rojane û ekonomîyê hemwelatîyan ser o tesîrêko gird kerd. Şarê Geverî nerazîyîya xo ard ziwan.
Kamîl Bartinî vat: “Ma nêwazenê şer herêma ma de bibo la no şer zaliman heq kerdo. Bi serran bi hezaran ciwanê kurdî ameyê dardekerdene. Hêvîya mi a ya ke no rejîm nêmano. Qeçekê mi Urmîye de yê û do bêrê la ez tersena ke şênê bêrê yan ney.”
Mugdat Ernasî vat: “Ma wazenê ke şer tesîr nêkero kurdan ser. Hêvîya ma a ya ke Kurdîstan awan bibo. Merdimê ma uca ra yê, ma înan fîkrîyenê la sebebê dorpêçkerdişî ey nêşênê bêrê Vakurî.”
Ferzînde Çevîkî vat: “Vurîyayîşê rejîmê seba kurdan rindêr beno. Nê rejîmî bi hezaran kurdî dardekerdê. Werrekna no vurîyayîş bi rişnayîşê gonî ney bi muzakereyan bibîyêne. Qeçek û sîvîlî yenê kiştene, ma xemê rejîmî de nîyê.”
Bazirgan Mehmet Alî Bajerî vat: “Berê sinorî girêdaye yo, ma nêşenê bazirganîya xo bikerê. Verê fêkî, çay, birinc Îranî ra ameyêne la nika heme vindertê.”
Bazirgan Zekî Ercîkî vat: “Heme firsendê Geverî berê sinorî ser o virazîyenê. Girewtişê berî talûkeyêko gird o. Bi hezaran kesî debara xo bi bazirganîye kenê. Mîsal verê xîyar 60 lîreyan bî, nika Tirkîya ra yeno û 100 lîre yo.”
Çetîn Kayayî zî vat: “Her roje vayîya bazarî giranêr bena. Merdimê ma rîyê şerî ra ameyê Vakurî, zaf merdimê ma zî nêşênê vîyarê û bi saetan berê sinorî de vindenê.”
