Hemsereka Pêroyî ya DEM Partî Tulay Hatîmogullari derheqê hêrişanê Amerîka û Îsraîlî yê vera Îranî de vat ke mudaxeleyê hêzanê hegemonan seba menfeatanê dîzaynêko newe yo û vat: “Ma hemverê rejîmê mollayan ê. Çareserî mudaxeleyê teberî nîya. Çareserî Komarêka Demokratîke ya ke heqê heme miletan û bawerîyan teqez kena.”
Hatîmogullarî kombîyayîşê grûba partîya xo ya Meclîsî de qisey kerd.Qiseykerdişan ra ver sînevîzyono ke nehsê têkoşînê cinîyan keno, ame temaşekerdene. Dima ra Hatîmogullari qisey kerd û vat ke 8ê Adare Roja Cinîyan a Dinya nêzdî yo û heme cinîyanê têkoşer û ê ke têkoşînê azadîya cinîyan de cuya xo ra bîyê, ê yad kerdê.
‘Çareserî ne rejîmê mollayan ne zî Amerîka û Îsraîl a’
Hatîmogullarî derheqê hêrişanê Îranî de vat: “Cografyaya ma de her ca şer est o. Amancê nê şeran o yo ke hêzê kapîtalîstî goreyê menfeatanê xo Rojhelatê Mîyanênî newera dîzayn bikerê. Tehluke est a ke hêrişê Îranî vila bibê heme herême, Îraq û Urdunî ra zî vila bîyê. Hêrişan de gede, cinî û hemwelatîyê sîvîlî zî merdî. Ma nê hêrişan şermizar kenê. Ma hemverê rejîmê mollayan ê ke şaranê Îranî ser o teda keno. La çareserî bi nê hewayî mudaxele û kiştişê sîvîlan nîya. Çareserî ganî bieşka şaranê Îranî, kurd, faris, beluc, azerî û heme şar û temsîlkaranê Îranî bîyara têhet. Çareserî awankerdişê Komarêka Demokratîke yo ke heqê heme miletan û baweriyan mîsoger bikera.”
‘Bedêlê tewr gird ê şerî cinîyî danê’
Hatîmogullari bale ant tehdîdanê Şengalî ser o û vat: “Destkewtiştanê cinîyan hedef gênê. Tehdîdê vera Şengalî ke bi pêşengîya cinîyan Rayberîyêk ameya awankerdene mojneno ke Rojhelatê Mîyanênêko senînî wazenê. Hêrişê Rojava de zî eynî babete ameye mojnayene. La cinîyê bi munitişê gêsanê xo xoverdayîşêko gird mojna. Efxanîstanî de Talîban tedaya vera cinîyan rewa keno. Aktîvîst Yenar Mihemedî ke seba destkewtiştanê cinîyan têkoşîn kerdêne, ameye kiştene. Ma bi hurmet aye yad kenê.”
‘Sîyasetê bêcezayîye vernîya kiştişê cinîyan akeno’
Hatîmogullari vat ke dewlete bi sîyasetê vera cinîyan vernîya kiştişê cinîyan akeno û vat: “Tena yew roje de 6 cinîyê ameyê kiştene. La dadgeha dewleta fek de ne hetê cinîyan de ya la bi sîyasetê bêcezayîye rayîr akeno vernîya kiştişê cinîyan. Ganî huqûqêk ke cinîyan bipawê bêro cayîkerdene. Ganî dewlet dest vera sîyasetê ke hemverê cinîyan a bikişo.”
‘Ganî seba Ocalanî şertê azadî bêrê viraştene’
Hatîmogullarî peynîya qiseykerdişê xo de de vat ke Birêz Ocalanî mesajê 27ê sibate de bale ant Entegrasyono Demokratîk ser o û vat ke ê berê sîyasetêkê neweyî akerdê û ganî berê huqûq û demokrasî zî bêro akerdene û wina vat: “Ganî qerarê Mehkemaya Heqanê Merdiman bilez bêrê caardene. Hemşaredarê ma ke herinda înan de qeyûm ameyo tayînkerdene, ganî agêrê karê xo ser. Girewteyê nêweşî ganî bêrê azadkerdene. Ganî seba averşîyayîşê prosesî şertê azad ê Birêz Ocalanî bêrê viraştene. Seba ney zî hewce nêkeno ke paweyê vetiştê qanûnan bibê, tena huqûqo ke est o bêro şuxulnayene, bes o.”
Hatîmogullarî qiseykerdişê xo bi vatişê sloganê “Jin Jîyan Azadî” qedêna.
