Hemsereka Pêroyî ya DEM Partî Tulay Hatîmogullarî û Hemserekê Pêroyî yê DEM Partî Tuncer Bakîrhanî derheqê serrgêra vengdayîşê 27ê sibate de Anqara de kombîyayîşê çapemenî de qisey kerd û dîyar kerd ke êdî dora gameeştişî ya dewlete ya.
Partîya Têduştî û Demokrasî ya Şaran (DEM Partî) serrgêra yewin a vengdayîşê Aştî û Komelê Demokratîkî yê 27ê sibate ke hetê Rayberê Şarê Kurdî Abdullah Ocalanî ra amebi kerdene, Anqara de qezaya Çankaya de Sehneyê Yilmaz Guneyî de programêk organîze kerd. Zafêrê 150 sazgehanê çapemenî û rojnamegeran programê taqîb kerd.
Program bi rêzgirewtiş û mojnayîşê sînevîzyonî dest pêkerd. Sînevîzyon derheqê serrêka prosesê Aştî û Komelê Demokratîkî de bi.
Badê sînevîzyonî Hemserekê Pêroyî yê DEM Partî Tulay Hatîmogullarî û Tuncer Bakirhan, sîyasetmedarê kurd Veysî Aktaş, endamanê Heyeta Îmralî ya DEMyî Pervîne Buldan, Mîthat Sancar û Faîk Ozgur Erol û sîyasetmedarê kurd Ahmet Turk û parlamenterê DEM partî û endamê komîsyonî Cengîz Çîçek vîyart dîwan.
Verê ke mesajê Ocalanî yo newe bêro wendene Hemserekanê Pêroyî yê DEM Partî qisey kerd.
‘Ganî gamê şênberî bêrê eştene’
Hemsereka Pêroyî ya DEM Partî Tulay Hatîmogullarî destpêkê qiseykerdişê xo de Sirri Sureyya Onderî yad kerd û vat: “Vengdayîşê Aştî û Komelê Demokratîkî manîfestoyêk bi. Vengdayîşê cuyêka newîye bi. Birêz Ocalanî bi cesaret nê vengdayîşî kerd û hereketê ey zî goreyê ci gamê cesaretkarî eştî. Ma zî goreyê ci keye bi keye xebitîyayê. Nika dora dewlete ya, ganî gamê qanûnî bêrê eştene. Entegrasyono Demokratîk asîmîlasyon nîyo, cuyêka hempare û qebulkerdişê yewbînan a. Seba ke na cuye bêra ciwîyayîş berpirsîyarî milê sazgehanê sîyasetî ser o ya. Entegrasyono Demokratîk seba heme şaran o. Ganî heqê ziwanê dayîke, heqê bawerîyan bêrê bicaardene. Ganî komare biba komarêka demokratîke. Ma do têkoşînê xo heta peynî bidomnê.”
‘Ma do heta peynî wayîrê vengdayîşê Aştî û Komelê Demokratîkî vejîyê’
Badê cû Hemserekê Pêroyî yê DEM Partî Tuncer Bakîrhanî heme kesê ke têkoşînê aştî de dinyaya xo bedelnaye û Sirri Sureyya Onderî yad kerd û vat ke ey soz da ke rojêk na cografya ser o cuyêka têduşt û bi edalet bêra awankerdene.
Bakîrhanî wina vat: “Vengdayîşê Aştî û Komelê Demokratîkî yê Rayber Apoyî prosesêko newe da destpêkerdene. No vengdayîş hemverê çinhesibnayîşê manîfestoyê qebulkerdişê yewbînan o. La aştî bi gamanê yew hetî nêbena. Ganî dewlete zî gamanê şênberan bierza. Êdî berpirsîyarî ya dewlete ya. Ganî cuya pîyaciwîyayîşî bêro caardene. Ganî statuyê Birêz Ocalanî bi qanûnan bêro teqezkerdene û azadîya fîzîkî bêro ca. Birêz Ocalanî vat komar bê kurdan nêbena. Ma zî vanê bê kurdan komara demokratîke nêbena. Ma do heta peynî wayîrê vengdayîşî vejîyê.”
