Amed – Endamê rêveberiya MEBYA-DERê Şehmus Karadag da zanîn ku bi hezaran gerîla di oxira azadiyê de jiyana xwe feda kirine û wiha got: “Şehîd rûmeta vî gelî ne û divê di asta herî bilind de xwedî li bîranîna wan bê derketin.”
Demek berê Tevgera Azadiya Kurdistanê şehadetên gerîlayên di dem û deverên cuda de jiyana xwe ji dest dane ragihand û li gel van li gelek navendan ji bo cangoriyên Tevgera Azadiyê bîranîn hat lidarxistin û hê jî tên lidarxistin. Bi sed hezaran welatî serdana şînan kirin û xwedî li cangoriyên xwe derketin. Lê ev xwedîderketina bîranînan ji hêla rayedarên AKPî ve hatin hedefgirtin û piştî hedefgirtinê gelek kes bi hinceta tev li bîranîna bûne, hatin binçavkirin. Li ser medyaya dijîtal jî ji aliyê kesên li dijî pêvajoyê ne li hember bîranînan nêzîkatiyeke nijadperest hat nîşandan.
Endamê rêveberiya MEBYA-DERê Şehmus Karadag derbarê êrîşên li ser şehîdên gelê Kurd ji ajansa me re axivî.
‘Bi her awayî gelê Kurd xwedî şehîden xwe derketiye’
Şehmus Karadag di axaftina xwe de destnîşan kir ku gelê Kurd di bin her şertî de xwedî nirxên xwe derketiye û wiha got: “Di mijara warê xwedîderketina li cenazeyan de, dema ku mirov bi awayekî durust û bi berpirsiyarî ji aliyê dîrokî, exlaqî û wijdanî ve li mijarê binêre, tê dîtin ku gelê Kurd di gelek waran de xwedî li nirxên xwe derketiye. Çawa li cîhanê civak bi awayekî bi rûmet xwedî li cenaze û şehîdên xwe derdikevin, gelê Kurd jî bi heman awayî xwedî li şehîdên xwe derketiye.”
‘Gelê Kurd berdêlên giran da’
Şehmus Karadag zanîn ku gelê Kurd di rêya tekoşîna Tevgera Azad a Kurd de gelek berdelên giran daye û got ku berdelên herî giran jî malbatên ku zarokên xwe winda kirine dane û wiha pê de çû: “Bi salan e gelê Kurd di vê oxirê de berdêlên giran daye, şehîd daye û bi awayekî fedakarane ev nirx parastiye. Bi taybetî di warê rêxistinbûn û pergala civakî de, tevî hemû astengiyan jî malbatên şehîdan xwedî li van nirxan derketine. Malbatên şehîdan bi kedeke mezin zarokên xwe mezin kirine, di nava şert û mercên zehmet de têkoşîneke mezin raber kirine.”
‘Divê statûya şehîdan bê naskirin’
Herî dawî Şehmus Karadag diyar kir ku desthilatdar divê statûya van şehîdan qebûl bike û wiha dawî li axaftina xwe anî: “Pêwîst e desthilat û saziyên têkildar jî vê rastiyê qebûl bikin. Divê statûya şehîdan bê naskirin, mafên wan ên qanûnî û exlaqî werin parastin. Gelê Kurd mafê xwe yê di vî warî de dixwaze û divê her kes rêzê li van nirxên pîroz bigire. Ev şehîdên ku ji bo azadiyê jiyana xwe feda kirine, rûmeta vî gelî ne û divê di asta herî bilind de xwedî li bîranîna wan bê derketin.”
