Li Nisêbînê bi hezaran kes ji bo xwedîderketina destkeftiyên Rojavayê Kurdistanê meşiya û dilsoziya xwe ya bi Rojava re anîn ziman. Çîgdem Kiliçgun Uçar piştî meşê axivî û got ku ji bo berdana DAIŞiyan ji bilî Kurdan her kes kêfxweş e û direqise.
Li Nisêbînê pêşengiya Platforma Saziyên Demokratîk bi hezaran kes ji bo xwedîderketina li Rojavayê Kurdistanê meş li dar xistin. Meşê ji ber Goristana Hecacan dest pê kir û heta Cadeya Midyadê berdewam kir. Hevserokê Giştî yê DEM Partiyê Tuncer Bakirhan, Hevseroka Giştî ya DBPê Çîgdem Kiliçgun Uçar, parlamenterên DEM Partiyê, hevşaredarên DEM Partiyê, Dayikên Aştiyê, aktîvîstên TJAyê, nûnerên rêxistinên sivîl û bi hezaran kes tev li meşê bûn.
Pêşî girseyê xwest bimeşe ser sînorê Nisêbînê û Qamişlo lê belê polîsan astengî derxist û destûr neda girse bimeşe ser sînor.
Di meşê de bênavber dirûşmên dilsoziya bi Rojava re hatin berzkirin. Her wiha girseyê bi hêrsek mezin dirûşma “Terorîst Colanî” berz kir. Girseyê bênavber dirûşma “Rojava rûmeta gelê Kurd e” berz kir.
Meş li Cadeya Midyadê bi dawî bû û li vir daxuyanî hate dayîn.
Hevseroka Giştî ya DBPê Çîgdem Kiliçgun Uçar axivî û bi bîr xist ku duh di êrişa polîs-leşkeran îşkence li ciwanê bi navê Diyar Koç kiriye û got ku dîmenê îşkenceyê bi kêfxweşî parve dikin.
‘Ji bo DAIŞî hatine berdan her kes direqise’
Çîgdem Kiliçgun Uçar anî ziman ku gelê Kurd bi paş ve gav navêje û wiha got: “Ew guleyên tên avêtin li nasnameya gelê Kurd tên xistin. Xwezî qasî bi 10ê Adarê re mijûl bibûna bi banga 27ê Sibatê re mijûl bibûna. Mezlûm Ebdî hê jî dîplomasiyê îfade dike ev gelek girîng e. Divê ev firsend bê nirxandin. Me têkoşîna xwe ji bo hemû gelan da. Çeteyên HTŞê û DAIŞê çi hêvî dikin. Dema jinên gelê Kurd di avahiyan de hatin avetin dilê wan hate derxistin gotineke we nîne. Em şerm dikin ku li Tirliyeyê hezkirina DAIŞê heye. Dibêjin şûna Kurdan bila DAIŞ û HTŞ hebe. Yekane cih heye ku hemû nasname bikarin lê bijîn ew jî Rojava ye niha dilê Kurdan li Rojava lê dide. Çend roj in gelê me li kolanan e naskirjna nasnameya Kurd ev qas diçe zora we. Gelê Kurd nasname û zimanê xwe dixwazin. Heke li cihekê civak azad nebe li wir kes azad nabe. Hemû partiyên siyasî yên li Tirkiyeyê berê xwe bidin banga 27 sibatê. Em vê firsendê binirxînin. Em welatekî model bi hev re ava bikin. Di serî de Tirkiye li Rojhilata Navîn û cîhanê ji herkesê re dibêjin xwedî li HSDê derkevib. Em bûn şahid ku DAIŞê çi kir. Niha her kes bêdeng maye hema bêje dê ji bo serkeftina DAIŞê bireqisin. Em ê azadiya gelê Kurd tirkmenan û hemû gelan biparêzin. Em dibêjin ne tarîtiyê xwedî li azadiyê derkevin. Gelê Kurd winda nekir dê winda neke. Em her dem li kêleka Hêzên Sûriya Demokratîk in.”
Piştî axaftinan girse li kuçe û kolanên navçeyê belav bû . Beşek girseyê berê xwe da ber Parka Navenda Çanda Mîtanî. Polîsan li vir êrişî girseyê kir û rojnameger jî di nav de gelek welatî hatin binçavkirin.
Her wiha polîsan li Parka Aştiyê ya li Sûka Nisêbînê jî êrişî girseyê kir û rojnameger û welatî bi îşkenceyê hatin binçavkirin.
