Yew şîrketanê tewr girdan ê zîrekîya viraşte OpenAI eşkere kerd ke wextê ceribnayîşê ewleyî de sîstemê înan kontrol ra vejîyayo û bi sereyê xo hêrişê keyepelêkê înternetî kerdo.
Modela tewr averşîyaye ya şîrketê OpenAI wextê ceribnayîşê ewleyî de kontrol ra vejîyaye, xo torra înternetî ra girêda û hêrişê platformê naskerdeyî Hugging Face kerd. Badê nê qewmîyayîşê sîberî, şîrketê girdî yê zîrekîya viraşte mecbur mendî ke vilakerdişê modelanê xo yê neweyan bi hawayêko demkî vindarnê.
Sîstemo ke ameyêne ceribnayîş, mîyanê ci de modela GPT-5.6 zî estbîye. Goreyê eşkerayîye, ganî nê ceribnayîşî warêko girewte û înternet ra cîyakerde de biameyene kerdene. La modela zîrekîya viraşte bi hawayêko nêyeno zanayene rayêk dîya, sînoranê ewleyî ra vîyarta û xo resnaya torra înternetî.
Platformê Hugging Face bîye hedefê hêrişî
Badê ke sîstemî girêdayîşê înternetî viraşte, rasterast rîyê xo da platformê naskerdeyî yê program viraştoxan Hugging Face. OpenAI aşkere kerd ke modela seba ke bikewê na sîte, agahîyê nasnameyî yê nimiteyî û zaf metodê cîya yê hêrişî têdima û bi awayêko sîstematîk şuxulnayê. Platformê Hugging Face hewteyo verên eşkera kerdbî ke sîstemê înan ameyo astengkerdene, labelê nameyê OpenAI nêdabî.
Fikarê girdî estê
No qewmîyayîşo peyên fikarê serê ameyoxê zîrekîya viraşte hîna zêde kerdî. Sebebê fikarê ke teknolojîya wina zerar bido binawanîyanê krîtîke, şîrketê girdî sey OpenAI û reqîbê aye Anthropic qerar da ke vilakerdişê modelanê xo yê neweyan bi awayêko demkî vindarnê.
