Yewîya Çapemenîya Cinîyan (YRJ) dîyar kerd ke rojnamegerî seba cinîyanê kurdan tena karêko meslekî nîyo; tarîxî qeyd kena û problemanê cinîyan resnena heme dinya.
Yewîya Çapemenîya Cinîyan (YRJ) bi eşkerayîyêka nuştekîye rojnameger Gurbetellî Ersoz, Dîlîşan Îbîşe, Dîlovan Gever û heme şehîdê çapemenîya azade yad kerdî.
YRJyî eşkerayî de dîyar kerd ke bi munasebetê Roja Rojnamegeranê Cinîyan ê Kurdan (7ê teşrîna verêne) rayîrê rojnamegeranê cinîyan yad kenê. Goreyê YRJyî, înan bi vatiş, qelem û fotografan raştîye îfade kerda, raştîya komelê xo qeyd kerda û her şertî de vengê cinîyan resnayo dinya.
Eşkerayî de ame vatene ke na roje bi ked û fedakarîya rojnamegeranê cinîyan ê kurdan virazîyaya; verê heme zî Gurbetellî Ersoza ke 7ê teşrîna verêne ya 1997î de Başûrê Kurdîstanî de şehîd bîye.
YRJyî şehîd Dîlîşan Îbîşe û şehîd Dîlovan Gevere zî yad kerdî. YRJyî dîyar kerd ke Dîlîşan (12ê teşrîna verêne ya 2017î de şehîd bîye) û Dîlovan Gevere (13ê teşrîna verêne ya 2019î de şehîd bîye) sûcê ke çeteyanê DAÎŞî vera cinîyan û komelî kerdbî, qeyd kerdbî.
YRJyî eşkerayî de ard ziwan ke rojnamegerê cinî “bi vatiş û fotografan dêsê bêvengîye şiknayê, hadîseyê ke bîyî qeyd kerdê û raştîye vate.” Eşkerayî de wina ame vatene: “Ewro û heme prosesan de rojnamegerê cinî do problemanê cinîyan taqîb bikerê û biresnê heme dinya. Çapemenîya cinîyan tena hadîseyan taqîb nêkena; têkoşîn û xoverdayîşê cinîyan qeyd kena û bale ancena problemê cinîye ser o.”
Peynîya eşkerayîye de ame dîyarkerdene ke YRJ do seba averberdişê çapemenîya cinîyan, qeydkerdişê hadîseyan û pawitişê vîrê komelkî bixebitîyo.
