Girewteya sîyasî ya Kurde Werîşe Muradî, bi maneya ke tewrê mehkeme nêbîya, rejîmê Îranî cezayê qedexeyê têkilîya telefonî û pêvînayîşê keyeyî aye rê birna.
Torra Heqanê Merdiman a Kurdîstanî eşkera kerd ke, girewteya sîyasî ya Kurde Werîşe Muradî ya ke zindanê Evînî de girewteya, bi fermanê hakim Ebulqasim Selewatî, heqê aye yê telefon û pêvînayîşê keyeyî ameyo astengkerdene.
Ame zanayene ke, na ceza bi maneya ke Werîşe Muradî roja verê tewrê roniştişê mehkeme nêbîya, aye ra ameya birnayene. Verê naye zî zaf rey bi maneya ke paştî daya hemleya ‘Sêşemeyanê îdamî rê ney’ Werîşe Muradî ameya cezakerdene.
Yeno zanayene ke, Werîşe Muradî hetê Mehkemeya Şorişî ya 15. ya Tehranî ra bi serekîya hakim Ebulqasim Selewatî bi tometa ‘endamîya PJAK’î cezayê îdamî ci ra amebi birnayene. Dima zî na ceza hetê Dîwana Berze ya 9. ya Îranî ra semedê kêmanîyanê dosyaya cigêrayîşî de, ameye redkerdene û reyna seba Mehkemeya Şorişî ya 15. ya Tehranî ameye erşawitene.
