Endama Meclîsê Kede yê HDK’î Sera Yagmur Sonat dîyar kerd ke 1ê Gulane de muhîm o ke cinî waştişê xo wareyan de bîyarê ziwan û va ke hem semedê cinîyan, hem semedê komelî waştişê înan ê aştîye est o.
Konfederasyonê Sendîkayê Karkeran ê Şorişgêr (DÎSK), Konfederasyonê Sendîkayê Kedkarê Îstîmlakî (KESK), Yewîya Odaya Muhendisan û Mîmaran ê Tirkan (TMMOB) û Yewîya Tabîban ê Tirkan (TTB), qerar dayî ke emser 1ê Gulane Kadikoy de pîroz bikerê. Xebatê semedê 1ê Gulane dewam kenê. Cinî zî hemverê feqîrî û polîtîkayê dişminî kede xo hazir kenê ke vejîyê meydanan.
Endama Meclîsê Kede ya Kongreya Demokratîke ya Şaran (HDK) Sera Yagmur Sonat derheqê 1ê Gulane de jinnewsî ra qisey kerd.
Sera Yagmur Sonat dîyar kerd ke 1ê Gulane semedê înan tena roşan nîyo, roja têkoşînî yo û wina va: “Hem cinîyan, hem kedkarî 1ê Gulane de bi keda xo bidest kerdê. 1ê Gulane semedê ma roja têkoşînî ya. Semedê heqê sendîkalî, semedê meaşê têduştî kedkarî na roje têkoşîn kenê. Ma hêzê xo 1ê Gulane verê ra gênê û têkoşînê xo dewam kenê. Ma do mîrasê 1ê Gulane dewam kenê.”
Waştişê cinîyan
Sera Yagmur Sonat dîyar kerd ke ganî pêro kedkarî û karkerî, heqê têduştî ra feyde bigîrê û wina va: “Ganî merdimî meaşê ke eşkenê pê biciwîyê, bigîrê. No heqê înan o. Ewro meaşê asgarî binê sînorê vêşanî de yê. Nê semedî ra ma waştişê meaşê merdimayî kenê ke merdimî bieşkê pê biciwîyê. Ma heqê sendîkal û rêxistinbîyayîşî wazenê. Kargeriyan de cinîyan rê mobîng û teda yeno kerdiş. Ganî nê peynî bibê. Ganî cinî heqê têduştî feyde bigîrê. La çi heyf no çin o. Ganî destûrê welidnayîşî û ewnîyayîşî bêro dergkerdiş. Cinî waştişê ziwanî kenê. Ma cinî bi nê waştişan 1ê Gulane de vejîyê meydanan.”
‘Muhîm o ke waştiş meydanan de bêro ziwan’
Sera Yagmur Sonat wina qedêna: “Cinî her wareyê cuye de yenê binpaykerdiş. Polîtîkayê zext û hêrişan dir yenê rî bi rî. Yê tewr zêde krîz ra tesîr benê cinî yê. Nê semedî ra zî muhîm o ke waştişî wareyê 1ê Gulane de bêrê ziwan. Eynî wextî de waştişê ma yê lezkî yê aştîye est o. Nê semedî ra ganî ma meydanê 1ê Gulane pirr bikerê.”
