Karker û kedkarê ke beşdarî pîrozkerdişê 1ê Gulane bîyê, dîyar kerdê ke şer tesîrê xo cuya înan zî keno û no ser ê paştî danê pêvajoye û seba pêvajo aver şîra, destê înan ra çi bêro do bikerê.
Pêroyîya Kurdistan û Dinya de pîrozkerdişê 1ê Gulane ameyî viraştiş û bi milyonan karker vejîyayê meydanan. Karker û kedkaran her meydanî de na roje bi coş pîroz kerdê. Karker, kedkar, karmend, cinî, ciwan, teqawîd her beşê komelî ra bi milyonan kesî meydanan de waştişê xo ardî ziwan. Kurdistanê Bakûrî û şaristananê Tirkîya de zî emserre tesîrê pêvajoya ‘Vengdayîşê Aştî û Komelê Demokratîkî” ser pîrozkerdişê 1ê Gulane xo da nîşandayîş.
Amed de 1ê Gulane Meydanê Îstasyonî de ame pîrozkerdiş. Karker û kedkarê ke beşdarî mîtîngî bîyê, ajansê ma rê qise kerdê.
Hanîfe Kardaş a ke karker a, dîyar kerd ke 1ê Gulane seba înan roja xoverdayîşî ya û wina va: “Her dem wazenê kedkar û karkeran bi vêşanî terbîye bikê. Hetê ekonomî ra şar zehmetîyê zaf zêde anceno. Seba ci ma ewro ameyê mîtîngî, seba debara ma, çi destê ma bêro, ma do bikerê. Ma vanê; bila êdî dewlete dest polîtîkayê lêminî ra fek verado, tena rayîrêk est o, aştî û demokrasî yo.”
Endama Odeya Doktoran a Amedî Elîf Turan dîyar kerd ke ê 1ê Gulane ya heme karker û kedkaran pîroz kenê û wina domna: “Bi kedêka gird ma resayê ewro. Ma gonî rijna ke hetanî ma resayî nê daraxî. Ê ke nê rayîr de ked danê, ma înan bi rêzdarî yad kenê. Ma wazenê cayê karanê xo de azad kare xo bikerê. Vengdayîşê aştîye, vengdayîşêko pîroz o. Aştî do tesîrê xo ser karkeran zî biko, ma her dem vanê psîkolojîya weş, nê tena hetê fizikî de yo, her dem şer bandorî ser psîkolojîya komelî keno. Ma wazenê ameyoxê ma bi aştîye derbas bibo.”
Karker bi nameyê Alî Riza Yavuz zî da zanayîş ke ê ewro seba heqê xo ameyê meydanê mîtîngî û wina va: “Seba aştî û aramîye ma ameyê meydanî, ma hêvî kenê ke 1ê Gulane seba pêroyîya dinya aştî û aramîye bîyara. Rayberê Şarê Kurdî Abdullah Ocalan pêroyîya dinya ra 27ê Sibate de veng da. Ma vanê; aştî û aştî.”
