Dimayê di erdlerzanê pîlan ê ke bi girsîya 7.2 û 7.5î 24ê hezîrane de Venezuela de qewimîyayî, hûmara kesanê ke wefat kerdo, resaye hezar û 450.
Venezuela de dimayê erdlerzanê 24ê hezîrane, xebatê cîgerayîş û xelasnayîşî dewam kenê. Ame aşkerakerdene ke hûmara merdimanê ke cuya xo vîndî kerda resaya hezar û 450 kesan û yeno vatene ke beno ke na hûmare hîna zî vêş biba.
Serekê Parlamentoyê Neteweyî yê Venezuela Jorge Rodriguez, dimayê her di erdlerzanê pîlan ê bi girsîya 7.2 û 7.5î, zanayîşê peyênî yê derheqê hûmara merde û birîndaran de pare kerd.
Jorge Rodriguezî dîyar kerd ke hûmara qurbanîyanê erdlerzî resaya hezar û 450 kesan û zafêrê 3 hezar û 150 merdimî zî birîndar bîyê.
Jorge Rodriguezî da zanayene ke heta ewro 12 hezar û 721 kes rîyê erdlerzî ra cayê xo ra bîyê û koçber bîyê; sewbîna eşkera kerd ke 774 banî bi temamî rijîyayî.
Rodriguezî dîyar kerd ke spêroyê welatî de zafêrê 25 hezar wezîfedarî seba xebatanê cigerayîş û xelaskerdişî seferber bîyê. Yeno texmînkerdene ke Venezuela de hema zî bi desan hezar merdimî binê xirbeyan de yê.
Merkezê Cîgerayîşê Jeolojîk ê Amerîka (USGS) pare kerd ke 24ê hezîrane de Venezuela de tena bi mabênêkê 39 sanîyeyan, di erdlerzê pîlî yê bi girsîya 7.2 û 7.5î qewmîyayê.
