Heyetêko ke sîyasetmedar, temsîlkarê rêxistinanê sivîl, zanyar û rojnamgeran ra yeno pê, seba merasîmê çekronayîşî yê PKK’yî taqîb bikero, do siba Amed ra ver bi Başûrê Kurdîstanî bikewo rayîr.
Rayberê Şarê Kurdî Abdullah Ocalan vengdayîşo tarîxî yo dîyîn yê çekronayîşî gerîlayan rê kerd. Vengdayîşê Ocalanî ra pey yeno zanayene ke 11ê temmuze de grûbêk gerîla şaristanê Silêmanî yê Başûrê Kurdîstanî de merasîmê çekronayîşî yanî veşnayîşê çekan bi eşkerayîyêk raya pêroyî reyde pare bikero. Yeno vatene ke do grûba gerîla vengdayîşêk bikero ke rayîrê zemînê huqûqî û sîyaseto demokratîk seba înan bêro amadekerdene.
Seba taqîbkerdişê merasîmî zî do xeylê sîyasetmedar û zanyarî Vakurê Kurdîstanî û Tirkîya ra şêrê Silêmanî. Bi pêşengîya DEM Partî do no heyeto ke şêro Silêmanî rojnamegerî zî tede est ê. Heyet hemserekanê pêroyî yê partîyan, rayberanê partîyan, temsîlkaranê rêxistinanê sivîl û zanyaran ra yeno pê.
Heyet do siba Amed de kom bibo û bi otobusan ver bi Başûrê Kurdîstanî bikewo rayîr. Yeno vatene ke mîyanê heyetî de 100 ra vêşêr kesî est ê.
