Awa lêmine ke tesîsê AVKAMED’î ra herikîyena, Çemê Dîcleyî lêmin û jehrin kena. Na awa lêmine bena sebebê mergê mase û heywananê ke awe de ciwîyenê.
Tesîsê Parzunkerdişê Awa Şuxulnaya ya Averşîyaye serra 2018î de bi mesrefêko pîl hetê Mudirîyetê Pêroyî yê Rayberîya Awe û Kanalîzasyonî yê Amedî (AVKAMED) yê Şaredarîya Amedî ya Şaristanê Girdî ra amebi akerdene. No tesîs sey “tesîsêko newe ke awa gendawe bi temamî pak keno” amebi parekerdene. Ewro no tesîs bîyo sebebê lêminîya tewr pîl a Çemê Dîcleyî.
Uca ra awa sîya û lêmine herikîyena mîyanê Çemê Dîcleyî. Çend metre ra pey çem seke bikehr bîyo, kef keno û boya gemarî derûdorî de vila bena.
Dewijê ke qeraxê Çemê Dîcleyî de ciwîyenê, na rewşe ra bigazin ê. Dewijî vanê, “Ma êdî nêeşkenê îdare bikerê.”
Dewijê ke qeraxa çemî de ciwîyenê, vanê: “Ma vera averşîyayîşî nîyê la rast bêro xebitnayene. Wa awa çemê ma jehrin nêkerê.”
Dewijî xeylê reyan muracatê AVKAMED’î kenê. La heta nika tu çareserîyêka şênbere nêbîya. Tayê dewijî vanê ke tesîs riyê kemaneyanê ewnîyayîş, çinbîyayîşê kîmyewîyanê lazim û vêş şuxulnayîşî ra nêeşkeno bi hewayêko bi tesîr bixebitîyo.
Tesîs senî xebitîyeno?
Goreyê dane û eşkerayîyanê verê yê AVKAMED’î, no tesîs bi kapasîteya rojane 150 hezar metrekup awa şuxulnaya pak keno û yeno vatene ke awa ke yena pakkerdene “daraxa awa şimitişî de ya.”
Labelê awa lêmine û gemarine ke tesîsî ra herikîyena, xisarêko pîl dana Çemê Dîcleyî.
Dewijî vengdanê û vanê: “Wa berpirsîyarî bêrê tîya û bi xo bivînê ka çem senî jehrin beno.”
