Ayşe Çîftçî hemverê zewacê emrê tutîye, hemverê zextê ke ameyê kerdiş bi vatişê “Cinî azad nêbo, komel zî azad nêbeno” xoverdayîş û vurnayîşê xo daya destpêkerdiş û vat: “Semedê azadîya mi tu çîyêk ez nêkerî çinbî. Mi nê rew ra têkoşînê cinî ra fam kerdibî. Mi semedê cuyêka bi rumet têkoşînê xo dewam kerd.”
Xoverdayîşê cinîyan her wareyî de her ke şino zêde beno. Cinî têkoşînê xo rêxistinkerde dewam kenê. Ayşe Çîftîçî ke emrê qijî de ameya zewicnayîş, la cuyêka ci rê ameye ferzkerdiş qebûl nêkerd, bi wesîleya 8ê Adare Roja Cinîyanê Dinya ajansê Jinnewsî rê qisey kerd.
Emrê tutî de zewac û têkoşîn
Ayşe Çîftçî 1984ine de Erdîşê Wanî de ameya dinya û tena mektebê sereyîn wenda. Ayşe Çîftçî wina vana: “Semedo ke şêrî mekteb, mi xeylêk têkoşîn kerd la keyeyî mi nêşirawit. 14 serrî ameya nîşankerdiş û 15 serrî de zewicyaya û Stenbol de bi ca bîya. Ez şîya cayo ke qet nêzana. No ciwîyayîş mi rê ame ferzkerdiş. Zewacê emrê tutîtî, cuya merdiman açarneno cehenem. 12-13 serrî zewicnaye menda. 3 tutê mi virazîyayî. Problemê ke ameyî ciwîyayîş, mi nê probleman qebûl nêkerd. Mi têkoşînê xo dewam kerd. Nêzdîyê 10 serrî mi têkoşîn kerd. Mi muracatê dewletê kerd la çareser nêkerdî. Vatî, ma tutanê to to ra bigîrê bidê yurd. No semedê mi çareserî nêbî. Semedê mi asayîşê lazim bî. Têkoşînê cinîyan her tim serkêşî mi rê kerd. Mi têkoşîn nas kerd û no hêzek xurt da mi. Mi têkoşîn ra hêz girewt û problemê xo çareser kerd.”
‘Wexto ke pêro cinî azad bibê ez o zî xo azad hîs bikerî’
Ayşe Çîftçî dewam de wina vat: “Xora ez zaf têkoşînê cinîyan ra tesîr bîbîya. No het ra amancê mi no bî ke ez nê têkoşînî semedê xo tena nê, semedê pêro cinîyê ke sey mi têkoşîn kenê bikerî. Hemverê zîhniyetê koledarî û serdestîyê camêrdî yê cinîyanê Kurdistanî ser o yeno ferzkerdiş, mecbûr menda ke eşkerayîyêke bidî û mi nê çî bi nê têkoşînî bi dest kerd. Beno ke mi tay bi zehmetî derbaz kerdo, la nika semedê azadîya komelî têkoşîn kena. Beno ke mi semedê xo çîyêk nêkerdo, la tena eke pêro cinî azad bê ez eşkena azadîya ke ez wazena hîs bikerî.”
’18 serrî yo cinîyan dir têkoşînê xo dewam kena’
Ayşe Çîftçî prosesê wareyê sîyasî ser o qalî kerd û vat: “2002ine de mi yewin raya xo semedê DTP’yî şuxilna. Ê wextî de mi dest bi xebatan kerd. Xora ez şîne mîtîngan. HDP’yî dir hîn zêde aktîf bîya û mi xebatê cinîyan kerd. Nika zî hemserekîya DEM Partî ya Sancaktepeyî kena. 25 serrîya xo de mi dest bi xebatan kerd. Nika 43 serrî ya. 18 serrî yo têkoşîn dewam kena. Ma mehkumê bêçareserî nîyê. Ez 8ê Adare sey wareyê têkoşînî vînena. Çareyê ma est o. Paradîgmaya azadîya cinîyan est a.”
