Serekê Baroyê Amedî Tahîr Elçî serrgêra kiştişê xo ya 10. de Mînareya Çarlinge ver de ame yadkerdene. Birayê Elçî, Ahmet Elçîyî dîyar kerd ke Tahîr Elçî seba ke vat, “PKK rêxistina terorî nîya, rêxistinêka sîyasî û aştîwaz a” ame kişetene.
Serekê Baroyê Amedî Tahîr Elçî, 28ê teşrîna peyêne ya 2015î de Mînareya Çarlinge a qezaya Sûrî ya Amedî ver de amebi kiştene. 10 serrî kiştişê Elçîyî ser o vîyartê. Bi pêşengîya Baroyê Amedî, Amed de programê yadkerdişî ame kerdene. Bi munasebetê yadkerdişê Tahîr Elçîyî vernîya Edlîyeya Amedî de bi beşdarîya bi seyan avûkatî kom bîyê û hera ver bi Mînareya Çarlinge rayra şîyê. Serekê xeylê baroyan, parlamenterê DEM Partî û CHP’yî, xeylê pawitox û welatijî beşdarê rayîrşîyayîşî bîyê. Rayîrşîyayîşî de pankartê “Ma to xo vîr ra nêkenê” û fotografê Tahîr Elçîyî ametê akerdene. Rayîrşîyayîşî de bêmabên sloganê “Şehîd namirin” ame vatene. Girse dima ke resa vernîya Mînareya Çarlinge saeta ke Tahîr Elçî amebi kiştene, saete 10:53î de rêze ameye girewtene.
‘Kesanê ke Tahîr Elçîyî hedef girewt, aştî zî kerde hedef’
Serekê Baroyê Amedî Abdulkadîr Guleçî ewilî eşkerayî daye û dîyar kerd ke 10 serrî seba aştî rayra şonê û vat: “Şima dewaya Tahîr Elçîyî rê wayîr vejîyayê. Tahîr Elçî bi suîkastêk ame kiştene. Dewaya ke ameye akerdene zî waştişê edaletî nêvert orte. Tahîr Elçî tena hiqûqnasêk nêbi, o pawitoxê heqanê merdiman bi. Pawitoxê ê kesan bi ke heqê înan ameyêne binpaykerdene. Tahîr Elçîyî seba ke aştî biba, gelekî kede daye. La ewro kiştişê Tahîr Elçîyî hema zî nêameyo roşnîkerdene. Ey na herre ser o şer nêwaştêne. Vatişê Tahîr Elçîyî ‘Ma şer nêwazenê’ hema zî goşanê ma de yo û gulbang dano. Kesanê ke Tahîr Elçî kerd hedef, aştî zî kerd hedef. Ma tîya de reyna vanê heta ke heqîqetî nêvejê orte aştî zî nêyena ca. Ma sey Baroyê Amedî vegdanê ‘Ganî bepirsîyarê kiştişê Tahîr Elçîyî bêrê vînayene.’ Birêz Tahîr Elçî keda to ewro mîyanê hemmeslekanê to de gandar o û ma wayîrê keda to vejîyenê. Ma qerardar ê, heta ke ma aştî bîyarê nê welatî ma do xover bidê.”
‘Ganî rastîye vejîya orte’
Serekê Yewîya Baroyanê Tirkîya Erînç Sagkanî zî qisey kerd û dîyar kerd ke ewro seba ke rastîye vejîya orte ê tîya de yê û nê çîyî vatê: “No 10 serrî yo tîya de eyn waştiş yeno kerdene. Demo ke polîtîkaya bêcezaverdayîşê nê welatî ra warişte, ma do vajê aştî ameye nê welatî.”
‘Tahîr Elçîyî zanayêne ke bi çekan aştî nêyena’
Dima zî birayê Tahîr Elçî, Ahmet Elçîyî qisey kerd û ard vîr ke Tahîr Elçî ser o zilm ame kerdene, o ame tehdîtkerdene û wina vat: “Bi Tahîr Elçîyî ame waştene ke vatişê ‘PKK rêxistina terorî ya’ bidê vatene. La Tahîr Elçîyî vat, ‘PKK rêxistina terorî nîya. Rêxistina sîyasî û aştîwaz a.’ Tahîr Elçîyî zanayêne ke bi çekan aştî nêbena, o semed ra tîya de vat, ma çekan nêwazenê, û dima ra ame kiştene.”
Qiseykerdişan ra pey beşdaranê propgramê qerenfîl ronayê linganê Mînareyî ver o û program tîya de qedîya.
