Hemsereka MED-DER’î Şukran Yakut awanbîyayişê Ajansê Welatî ser kêfweşîya xo ard ziwan û xebatê ziwanê Kurdkî ser zî vat ke ganî ziwanê Kurdkî bibo ziwano fermî
Tirkîya de her ke şono polîtîkayê asîmîlasyonî zêdîyenê, verba nê polîtîkayê lêşînî de zî sazî û dezgehê ziwanî, xebatanê xo domnenê. Nê sazîyan ra tewro muhîm Komeleya Cigêrayişê Ziwan û Kulturanê Mezopotamyayî (MED-DER) ya. Polîsan hêrişê banê MED-DER’î kerdê, rayber û hemserekê sazîye girewtê binçiman la sazîya MED-DER’î xebatê xo yê ziwanî domnena.
Hemsereka MED-DER’î Şukran Yakut hem seba ronîyayişê Ajansê Welatî hem zî verba ziwanê Kurdkî polîtîkayê asîmîlasyonî ser o Ajansê Welatî ra qise kerd.
Hemsereka MED-DER’î Şukran Yakut ronîyayişê Ajansê Welatî ser kêfweşîya xo ard ziwan û vat ke: “Ajansê Welatî ma hemin û şarê ma rê xêrîn bo. Ajansê Welatî heskerdoxê ziwanî de hêvîyêk viraşt û no zî zaf bi muhîm a. Ma wazenê sey Ajansê Welatî, platformî zêde bibê.”
Hemsereka MED-DER’î Şukran Yakut bal ant ser ziwanê Kurdkî telukeya asîmîlasyonî wina vat: “Ma verba asîmîlasyonî her tim xebatanê xo zêdîna. Seba averşîyayişê ziwanî, ma atolyeyê domanî, xebatê dewan kerd. Ma hetanî nika xususî xebatê hîşyarîye kerd û do ma bikê zî. Xebatê ma qiym nêkenê, no ser ganî ma heme kuçeyan ra biresê û hîşyarîya ziwanî awan bikê. Ma ganî bizanê asîmîlasyon çiqas bi teluke yo. Ma her tim şarê Kurdî ra pêşnîyar kenê ke wa bi ziwanê xo qise bikerê. Ma seba averşîyayişê ziwanê xo do her çik bikerê. Ma do şarê xo reyde xebatanê xo bikerê.”
Kurdkî wa bibo ziwano fermî
Şukran Yakut aşkera kerd ke verba polîtîkayanê asîmîlasyonî qatî ziwanê Kurdkî do bibo ziwanê perwerdeyî û sey ziwano diyin bêro şinasnayiş û wina vat: “Yew ziwan hetanî ziwanê perwerdeyî nêbo aver nêşono, hetta cuye zî nêkeno. No ser ma şarê xo ra wazenê, wa heme karanê xo bi ziwanê dayîka xo bikerê û biwazê wa ziwanê Kurdkî bibo ziwano fermî.”
Kitabê musnayişî
Şukran Yakut tewro peynî wina vat: “Ma bi akerdişê kurs û atolyeyan bi seyan wendekar resnayê la tena bi akerdişê kurs û atolyeyan, ma nêeşkenê verê asîmîlasyonî bigê. Kitabê ma yê musnayişî estê. Tena bi xebatanê teknîkî averşîyayiş nêbeno, ganî ma kuçe bi kuçe, şaristan bi şaristan xebatê xo bi pratîkî bikerê û ma ziwanê xo bipawê.”
