DEM Partî, DBP û TJA Amed de startê “Mitîngê Azadîye” da. Endamê Komîteya Amadekar a Mitîngî Mûhîttîn Muguçî eşkerayî daye û vengdayîşê tewrbîyayîşê hêzanê demokratîkan kerd û wina vat: “Nika wextê rayîrşîyayîşê ver bi azadîye yo.”
“Mitîngê Azadîye” bi pêşengîya DEM Partî, DBP û TJA, do 28ê hezîrane de Qadê Îstasyonî yê Amedî de, saete 17:00î de bêro viraştiş. Sazgehanê serbastan eynî babete ser o, binê banê Rêxistina DEM Partî ya Amedî de bi eşkerayî startê “Mitîngê Azadîye” da. Endam û rayberê DEM Partî û DBP’yî yê Amedî, aktîvîstê TJA, temsîlkarê dezgehanê sivîlan û zaf kesî tewrê na eşkerayî bîyî.
Kombîyayîşî de pankarto ke ser de “Bi Rayberîya Azade û Ver bi Komelê Demokratîkî” ameyêne nuştene ame aliqnayene. Endamanê Komîteya Amadekar ra Hemserekê Şubeyê OHD’yî Amedî Muhîttîn Muguçî bi kurmancî û Cagira Hemserekanê DEM Partî ya Amedî Gulîz Kaya zî bi Tirkî metnê eşkerayî wend.
‘Şarî reyna dî ke aştî çend bierj a’
Mûhîttîn Muguçî dîyar kerd ke şarê kurdî bi desan serran o ke seba azadî, nasname û cuyêka bîrûmete têkoşîn dano û wina vat: “No têkoşîn de bedêlê giranî ameyî dayene; tena şarê Kurdî nê, pêro şarê ke têduştî û demokrasî wazenê, ê zî dejê pîlî antî. Labelê rixmê pêro tedayan zî îradeyê azadîya şaran nêameya teslîmgirewtiş. Vengdayîşo ke 27ê sibate de hetê Birêz Abdullah Ocalanî ra amebi kerdene, seba çareserîya demokratîke û cuya pîya qonaxêko tarîxî ya. No vengdayîş; perspektîfê komelê demokratîkî yo ke şar şêno tede bi ziwan, nasname û statuyê xo bi azadî bîciwîyo, kerd. Prosesê verênî de, bi vindarnayîşê şer û pirodayîşan komelî nefesêk girewt, hêsîrê çimanê dayîkan vindertî û şarî reyna dî ke aştî çend bierj û bimana ya.”
‘Gerek şert û mercê xebatî yê birêz Ocalanî bêrê serastkerdene’
Mûhîttîn Muguçî qiseykerdişê xo de îfade kerd ke waştişê şaran o yo ke seba aştîyêka bîrûmet û domdare, gamê demokratîkî bilez bêrê eştiş û nê çîyî vatî: “Verê her çî gerek qanûnê ‘Têkoşînê vera Terorî’ bêra hewaneyene, qanûnê antîdemokratîkî bilez bêrê vûrîyayene. Gerek nê kerdişê qeyûman biqedîyê, girewtwyê sîyasî bêrê veradayene, qedexeyê serê ziwan û kulturê şarê kurdî bi temamî bêrê wedaritene. Seba ke aştî xurt biba û çareserîya demokratîke aver şêra, gerek şert û mercê gureyî û xoresnayîşî yê birêz Abdullah Ocalanî bêrê serastkerdene û bi qanûna bîgîrî bînê garantî, şertê azadîya ey ê fîzîkî bêrê akerdene. Rojhelatê Mîyanênî mîyanê şer û krîzan de mendo; aştî êdî lazimtîyêka winasîn a ke nêna ereykewtiş. Çareserîya demokratîke, tena ameyoxê şarê kurdî nê, ameyoxê hempare yê heme şaran o ke Tirkîya de ciwîyenê.”
‘Nika demê rayraşîyayîşê ver bi azadîye yo’
Mûhîttîn Muguçî peynîya qiseykerdişê xo de derheqê mitîngê “Hêvî û Azadîye” de agahî dayî û wina qiseykerdişê xo qedêna: “Nê semedî ra, ma sey şarê Amedî; 28ê hezîrana 2026î de, saete 17:00î de Qadê Îstasyonî de, bi sloganê ‘Bi Rayberîya Azad Ver Bi Komelê Demokratîkî’ do qadan de bibê. Bi nê nêzdibîyayîşî ma veng danê şarê xo, ciwanan, cinîyan û kedkaran, yanî pêro hêzanê demokratîkan kenî ke ma bêrê têhet. Nika wext wextê berzkerdişê vengê xo yo! Nika wext wextê berzkerdişê waştişê demokrasî yo. Nika wextê rayraşîyayîşê ver bi azadîye yo.”
