Hemşaredara Sêrtî Sofya Alagaş bi vatişê, “Meseleyê qeyûmî zûrêka pîl o” reaksîyon verba tayînkerdişê qeyûman mojna û wina vat: “Tirkîya vernê de şaro ke ci dir ciwîyeno xapênena, badê pêro welatanê dinya sey wayîrê demokrasî bo, mojnena.”
Roniştişê dewaya Hemşaredara Sêrtî Sofya Alagaşa ke semedê xebatanê wextê rojnamegerîye de bi îdiayê “endamîya rêxistine” ameyêne muhakemekerdiş, vizêrî roniştişê ci Dadgeha Cezaya Girane ya 5. ya Amedî de ame kerdiş. Dadgehe, 6 serrî û 3 aşmî cezaya hepsî da Sofya Alagaş. Wezaretê Karê Zereyî badê cezaya Sofya Alagaş, Şaredarîya Sêrtî rê qeyûm tayîn kerd.
Sofya Alagaş verba tayînkerdişê reaksîyon mojna.
Sofya Alagaş, ard ziwan ke qalê tayînkerdişê qeyûman ameyêne kerdiş û dîyar kerd ke qerar bi lez û bez ame dayîş û vizêrî zî ceza ameye dayîş. Sofya Alagaş vat: “Ma zanê ke amadekarîya qeyûman estbî û bi talîmatan na ceza daye. 24 saet badê cezayî qeyûm ame tayînkerdiş. Ez hema yena muhakemekerdiş, qerarê peynî çin o. La hukmatî nê çî kerd sebebê qeyûmî. Îqtîdar xo rê maneyêk gêreno û semedê kesê ke dosyaya înan çin a cipersayîşê neweyan akeno.”
Sofya Alagaş da zanayene ke Tirkîya dinya xapênena û wina vat: “Meseleyê qeyûman zûrêka pîl o. Tirkîya vernê de şaro ke ci dir ciwîyeno xapênena û badê zî pêro welatanê dinya rê sey wayîrê demokrasî bo mojnena.”
