AMED – Platformê “Şiyar Be! Platformê Têkoşînî Verba Tiryakî de” startê kampanyaya ‘Rabin’ da. Platformî veng da ke wa mehele, mekteb, kuçe û her warê cuyayişî de komelo exlaqî û polîtîk reyna bêro roniştiş.
Platformê “Şiyar Be! Platformê Têkoşînî Verba Tiryakî de” bi eşkerayîyêka ke Parkê Koşuyolu de, startê kampanyaya ‘Rabin’ da. Temsilkarê dezgehanê komelanê sivîl, temsilkarê partîyanê sîyasîyan û xeylê welatijî tewrê ci bîyî. Metnê eşkerayîye yo Kurmancî hetê Hemverfeka Platformî Gulşen Demîre ra, metno Tirkî zî hetê Hemverfekê Platformî Murat Kanî ra ameyî wendene.
Metnê eşkerayîye wina yo:
“Nê erdanê qedîman ê ke merdimayîye tede awan bîya de ewro ma ameyî têhet ke îradeyê xo yê pawitişê rûmetê merdimaye pîl bikerî. Eke mesela teyna bîyayişê heyatî bo; her estbîyayeyo ke beno pîl, pawitena xo miseno, ma eşkenî vajî ke cuyeno. Labelê merdimatîye ke hîrê xalê taybetî vîyarnayî û kewt dima raştîye û gêra daxilê azadîye bî. Hetê naye ra daxilê fêhm û wijdanî bî. Bi nê fêhm û wijdanî, komelo ke tede ciwîyeno zî pîl kerd, bedelna û kerd komel. Labelê pîya bi awankerdişê pergalê dewlete mîyanê demî de komelbîyayîşê merdimatîye zî ameyê hedefgirewtiş û bi destê modernîteya kapîtalîste nê hêrişî kerdê sîstemêk.
Şer o taybet
Zê zaf cayanê dinya, Kurdîstan de zî bi destê sîstemê dewlete û bi metodanê şer ê taybetî, şexsê ciwan û cinîyan de hedefgirewtişê komelî dewam keno. Çike komel; kombîyayişê wîjdanê hemparî, ked û gêrayîşê raştîya hemparî yo. Çike komelo exlaqî û polîtîk verba berjewendîyanê dewlet, sermaye û serdestan de yo. Serebûtanê zaf serran ra ma zanenî û ma tecrube kerd ke şer o bingeyên verba xirabekerdiş, rijnayîş û tewirbîyayîşê exlaq û fêhmê komelî de yeno rayraberdene.”
