Amed – Odaya Mîmaran a Amedî da zanayene ke Sûr de awanîyê qaçaxî zêde benê û restorasyonê bêtedbîrî seba cuya welatijan tehlîke virazenê.Hevserekê Odayî Şerefxan Aydin dîyar kerd ke seba pawitişê nê mîrasê panc hezar serran ê merdimîye, hewcehî bi rayîrvistiş yê hemparî û komxebatêka bilez esta û vat: “Sûr erjê pêro merdimîye yo.”
Şubeyê Odaya Mîmaran a Amedî, derheqê rijnayîş, problemanê şaristanî û pêşniyaranê çareserî yê qezaya Sûrî de “Raporê Çimdarî û Pêşnîyaran ê Sûrî” bi eşkerakerdişêk 9ê temmuze de bînaya xo de raya pêroyî rê pare kerd. Eşkerayî de veng dîya pêro dînamîkanê şaristanî ke seba pawitişê qezaya Sûrî mîyanê liv û têgêrayîşî de bê.
Hevserekê Odaya Mîmaran a Amedî Şerefxan Aydin detayê “Raporê Çimdarî û Pêşnîyaran ê Sûrî” de Ajansê Welatî (AW) reyde pare kerdî.
‘Sûr de bînayê qaçaxî virazîyenê’
Hevserekê Odaya Mîmaran a Amedî Şerefxan Aydin qîmetê tarîxî yê qezaye sero vindert û dîyar kerd ke Sûr serra 2015 de hetê UNESCOyî ra sey mîrasê pêro merdimîye ameyo tescîlkerdene. Şerefxan Aydin dîyar kerd ke Sûr hem seba Amedî hem seba herême hem zî seba pêro dinya cayêko taybet o û nê demê peyênî de tîya de çîyê şaşî benê. Şerefxan Aydin viraştişê keyeyanê qaçaxan sero vindert û wina vat: “Çi heyf ke seke ma vînenê zaf keyeyî, awanîyê qaçaxî virazîyenê. Ganî verê şaredarî, seba ke sazgehê berpirsîyara yewine a ya, vernîya naye bigîro, ganî nêverdo awanîyê qaçaxî virazîyê.”
‘Xebatê restorasyonî seba welatijan tehluke yo’
Şerefxan Aydin dewamê qiseykerdişê xo de xebatê restorasyonî yê ke nêmcet mendê sero vindert û dîyar kerd ke ganî nê xebatî bêvindertiş dewam bikerê û demêko nêzdî de biqedîyê. Şerefxan Aydin ard ziwan ke kêmanîyê ewlekarî yê hewayê xebate de seba şarî problemê girdî yê û vat: “Nê restorasyonî, wasitaya restorasyonî yê sey îskele û sacan seba welatijanê ke mîyanê Sûrî de gêrenê tehlukeyê girdî virazenê. Bê girewtişê tedbîranê ke hewce kenê xebatê restorasyonî yenê kerdene.” Vengdayîşê komxebate û rayîrvistişî yê hemparî Şerefxan Aydin vîr vist ke înan raporê xo de bi hîrayî behsê problem û pêşniyaranê çareserî kerdo û dîyar kerd ke ganî Şaredarîya Amedî ya Şaristanê Girdî, Şaredarîya Sûrî û Heyetê Mîmarî yê Pawitişê Cugehî serê na babete de bêrê têhet û nê çî ardî ziwan: “Ganî seba ameyox û pawitişê Sûrî rayîrvistişêk bêro viraştene. Ma pêşniyarê komxebatêke kerd ke wa nê çîyê ke ma vanê bi her hawayî bêrê munaqeşekerdene. Seba çareserî kamcîn rayîr raşt o ganî ma detayanê înan ser o vinderê, seba naye zî hewcehî bi komxebatêke esta.”
‘Sûr qîymetê pêro merdimîye yo’
Şerefxan Aydin tarîxê panc hezar serran ê Sûrî sero vindert û ard ziwan ke verê Kurdan zî zaf medenîyetan nê şaristanî de cuye xo awan kerda û wina peynî da qiseykerdişê xo: “Sûr bi hezaran serran o est o, kamcîn milete ameya tîya, nexşê cuya xo bînayan ser de viraşto. Kurdî zî bi seyan serran o tîya de ciwîyenê, la verê Kurdan zî zaf medeniyetî tîya de ciwîyayî. Seba naye zî, ganî rind bêro zanayene ke nê qîymetî, qîymetê pêro merdimîye yê.”
