Hetê rejîmê Îranî ra girewtiş û destbendkerdişê welatijanê kurdan dewam keno. Na çarçewa de welatijêko kurd şaristanê Şino de ame destbenkerdene û aqûbetê ci dîyar nîyo.
Komela Heqanê Merdiman a Kurdîstanî dîyar kerd ke 27ê adare de îdareyê Îtîlaetê Îranî şaristanê Şino yê Rojhelatê Kurdîstanî de dima ke seba girewtişê îfadeyî venga welatijo bi nameyê Silêman Qadir Gelwan kerdo, dima ra ey destbend kerdo û ey berdo cayo ke kes nêzano.
Ame vatene ke welatijo ke ameyo destbendkerdene birayê Ebdulselam Qadir Gelwan o ke 1ê Êlûla 2023î de serewedaritişê ‘Jin jîyan azadî’ de cuya xo vîndî kerda. Reyna ame vatene ke destbendkerdişê Silêman Qadir Gelwanî ra pey agahî daya keyeyê ey.
Lazim o merdim vajo ke aşma bîne de şariştananê cîya-cîyayanê Rojhelatê Kurdîstanî ra 36 welatijî û çalakîkerê kurdî ke hêzan seba îfadegirewtişî venga înan dayo, ameyê girewtene. Nînan ra 4 hebî zî cinî yê.
