Girewteya sîyasî ya kurde Werîşe Muradî ya ke Hepisxaneyê Evînî de tepişîyena, seba ke vera îdamî sloganî eştê, heqê qiseykerdişê telefonî û pêvînayîşê keye û avûkatan ame xespkerdene.
Reyna seba nuşteyanê aye yê serewedaritişî 6 aşmî cezaya bîne daye aye. Teda û binpêkerdişê heqan ê rejîmê Îranî yê vera tepişteyanê sîyasîyan ê kurdan dewam kenê. Ajansê Xeberan ê Aktîvîstanê Heqanê Merdiman (HRANA) derheqê weziyetê peyên ê tepişteya sîyasî ya Kurde Werîşe Muradî ya ke Hepisxaneyê Evînî yê Tehranî de tepişîyena de, zanayîşê neweyî vila kerdî.
Sloganê vera îdamî bîyî mazeret goreyê zanayîşan ra îdareyê hepisxaneyî sey “metodê cezakerdişî” tewr verê heqê qiseykerdişê bi telefonî Werîşe Muradî ra girewto û dima ra zî aye heqê pêvînayîşê rî bi rî yê bi keye û avûkanê xo ra bêpar verdaya. Ame dîyarkerdiş ke na qedexeya kêfî hema zî dewam kena. Eynî çimeyan dîyar kerd ke na cezaya neqanûnî badê çalakîyêka Werîşe Muradî ameya dayene. Amê vatene ke wexto ke Werîşe Muradî hewşê Hepisxaneyê Evînî de gêrayêne, vera polîtîkayanê îdamî yê rejîmê Îranî bi vengê berzî sloganî eştî. Îdareyê hepisxaneyî vera na helwêsta aye ya xoverdayoxe aye heqanê aye yê tewr bingeyinan ra bêpar verdaya. 6 aşmî cezaya neweye daye aye Hetê bînî ra, ‘Kampanyaya Azadîya Werîşe Muradî’ pare kerd ke zextê huqûqî yê serê Werîşe Muradî zî zêde bîyê. Ame zanayene ke seba mektub û nuşteyanê aye yê ke çarçewaya serrgêra serewedaritşê ‘Jin, Jiyan, Azadî’ de ameyê nuştene û vilakerdene, dewayêka neweye aye ser o ameya akerdene.
Netîceyê na dewaya newîye de, mehkemaya rejîmê Îranî bi îdiaya “propagandaya vera rejîmî” 6 aşmî cezaya hepisxaneyî ya bîne da Werîşe Muradî.
