Hemserekê Mezopatamya GOÇÎZDERî Vecîh Aydoganî dîyar kerd ke astengê verê welatiyanê ke wazenê agêrê dewanê xo hema zî est ê û programê çalakîyanê ke do semedê Hewteyê Koçberî virazê, eşkere kerd.
Komeleya Cigêrayîş û Çimdarîyê Koçberî ya Mezopotamya GOÇÎZDERî derheqê çalakî û programê ke do çarçewaya xebatanê 14-21ê hezîranî Hewteyê Koçberî de bikerê, bînaya komeleya xo ya qezaya Sûrê ya Amedî de eşkerayîyêk da. Nûnerê partiyanê siyasîyan û dezgeyanê sivîlan ê komelkî tewrê eşkerayîye bîyê. Hevserekê Mezopotamya GOÇÎZDER’î Vecîh Aydoganî yo ke eşkerayîye wende, diyar kerd ke ê do xebatanê xo yê çarçewaya Hewteya Koçberî de mabênê 14-21ê hezîranî de bi sloganê
‘Ganîbîyayîş do serê herdê maye de bibo bimana’ bîyarê ca. Vecîh Aydoganî destnîşan kerd ke amancê înan balantişê serê netîceyanê komelkî, ekonomîk û kulturî yê koçberî yo û sewbîna eşkerakerdişê mexdurîyetanê polîtîkayanê koçkerdişê bi darê zorî û sere de heqê agêrayîşê dewan, waştişê mexduranê koçberî bikerê rojevê raya pêroyî. Astengê verê agêrayîşê dewan Vecîh Aydoganî va ke taybetî serranê 1990î de semedê polîtîkayanê vengkerdişê dewan û koçkerdişê bi zorî bi mîlyonan merdimî herdê xo ra ameyî dûrkerdiş û bi mexdurîyetanê giranan ê ekonomîk, komelkî û kulturî ra rî bi rî ameyî verdayene û wina vat: “Ser o xeylê serrî derbas bîyê zî, problemê ke koçberî verdayê hema zî sewîyeyêka pîle de dewam kenê û astengê verê welatîyanê ke wazenê agêrê dewanê xo hema zî dewam kenê.”
Programê Hewteyê Koçberî de çalakîyî ke do bêrê viraştene wina yê:
*14ê hezîranê 2026î de saete 11.00 de, do şirê zîyaretê dewa Bîrikî ya qezaya Bismilê Amedî ke serranê 1990î de amebî vengkerdiş, bêro kerdene.
*Semedê bal antişê serê mexdurîyetanê vengkerdişê dewan do eşkerayîyêka girseyî ya çapemenîye bêra kerdene.
*17ê hezîranê 2026 de, semedê paştdayîşê nobeta ganîbîyayîş û dormeyî ya ke vera projeyanê JESî qezaya Gimgimê Mûşî de yenî kerdene, do şorê zîyaretê çadirê xoverdayîşî û çarçewaya zîyaretê paştdayîşî de do eşkerayîyêka çapemenî bêra dayene.
*21ê hezîranê 2026 de, banê komeleya ma de bi sernuşteyê ‘Awankerdişê Komelê Demokratîk de Agêrayîşê Dewan û Rolê Rayberîyanê Herêmîyan’ panelek do bêra kerdene. Panel de babetê sey heqê agêrayîşê dewan, berpirsîyarîyê rayberîyanê herêmîyan û muhîmîya cuya dewijî ya awankerdişê komelê demokratîk de do bêrê erjnayene.”
Vecîh Aydoganî diyar kerd ke nê xebatê ke ê do bîyarê ca do semedê nîşandayîşê netîceyanê polîtîkayanê koçkerdişê bi zorî, firsendêk bê ke heqê agêrayîşê dewan reyna bibo rojev û bibo hetkarê cigêrayîşê çareserîya demokratîke û vengdayîş kerd ke wa her kes tewrê programan bibo û paştî bido xebatanê înan.
