Gonul Alkan, 23ê sibate de hetê mêrdêyê xo Kemalettîn Alkan ra verê çimanê gedeyanê xo de ameye kiştene. Maya Gonul Alkan, Salîha Bozkurt Mudirîyetê Polîsan rexne kerd û vat: “Polîsan kênaya mi nêpawite. Êdî bes o, wa kêna û ciwanê ma nêmirê.”
Tirkîya û Vakurê Kurdîstanî de rojêk de 6 cinî bi şîdetê camêrdan yenê qetilkerdene. Nê trajedîyan ra yew zî qezaya Tuşba ya Wanî de qewimîya. Gonul Alkan a 33 serrî, 23ê sibate de hetê mêrdêyê xo Kemalettîn Alkan ra verê çimanê gedeyanê xo de ame kiştene. Maya çar gedeyan Gonul, mêrdeyê reyde wextê cîyabîyayîşî de bîye û derheqê mêrdeyê aye de qerarê dûrvistişî amebi girewtene. Maya Gonul Alkan, Salîha Bozkurt vera şîdeto ke cinî vînenê reaksîyon mojna û hukmat rexne kerd.
‘Zaf reyan gerre kerd la çîyêk nêvurîya’
Salîha Bozkurt îfade kerd ke kênaya aye zaf teda û zordarî mêrdeyê xo ra dîya û vat: “Xeylê reyan kênaya mi şîdet dîyêne. Çend reyan kênaya mi seba hetkarî şîye qereqol la tu netîce uca ra nêgirewt. Polîsan kênaya mi ra vatêne ke şo nêweşxane û raporê weşîye bigîrê ke ê bibê hetkar. Polîsan kênaya mi nêpawite. Kênaya mi zaf reyan gerre kerd, şîye qereqol la çîyêk nêvurîya. Tena vatêne ‘Ma kamca de rastê ey bêrê, ma do ey bigîrê.’ Naye ra çîyêk zî nêame kerdene.”
‘Ambûlans û polîsî erey ameyê’
Salîha Bozkurt behsê kiştişê kênaya xo kerd û wina vat: “Ma venga ambulans û polîsan da la erey ameyê. Heta ke ê ameyê, kênaya mi cayê hedîse de canê xo ra bîye. Êdî bes o. Wa wayîrê ma vejîyê. Endî wa kênaya ma û ciwanê ma nêmirê. Wa merdimê wina kiştoxî bi efûyêke serbest nêrê veradayene. Zerrîya mi veşena, ganî ma se vajê ? Ma senî vengê xo hîna zêde berz bikerê? Ma zî sey înan bê ? Ez qebul nêkena ke 20 serre ceza bidê ey. Ez wazena cezaya heta hetaye bigîro. Ez nêwazena kiştoxî wina bi efûyêk vejîyê û dest û linganê xo têşanê û mîyanê kuçeyan de bigêrê.”
