Amed- Odaya Doxtoran a Amedî kitabê Anamneza pêroyî (Hîkayeya nêweşî) da naskerdene.
Odaya Doxtoran a Amedî bi tewrbiyayîşê endam û rayberânê odayî, Hemşaredara Şaredarîya Amedî ya Şaristanê Girdî Serra Bûcak, Hemşaredaro verên ê Amedê Selçûk Mizrakli û xeylê meymanî salona kombîyayîşî ya Çand Amedî de kitabê “Anamneza Pêroyî (Hîkayeya nêweşî) da naskerdene.
‘Wexto ke ziwanê nêweşî u doxtorî yew nêbo, tedawî kêmî manena’
Verê naskerdene Serokê Odaya Doxtoran ê Amedî Veysî Ulgenî vat ke ganî pêro dezgehê ewilê muhîmî bidê ziwanê Kurdkî u wina qisey kerd: “Ma nê programê tena sey naskerdişê kitabî nêvînenê; ma waşt ke bi nê pêhesyayişî pêro dezgehanê xo rê nimûneyêk bimojnê ke her dezgehê ma cehd bikero ke kurdkî bido şinasnayene û kurdkî bixebitnê. Sihet de dima nêweşîye ra wasitayo tewr muhîm ziwan o. Wexto ke ziwanê nêweşî û doxtorî yew nêbo, tedawî kêmî manena.”
‘Wexto ke klînîk de nêweşî fam nêbo nêweşîye rê çare nêyeno vînayene’
Dima ra Hecî Ozkal qisey kerd û vat ez na xebate tena sey yew kitabî nêfikirîyena û wina domna: “Tîya de anamneza nêweşîyan di 25 doxtoran wezîfe girewto xo ser û goreyê hergû beşê nêweşîye ra persî hedernayê. Doxtorî % 70-80 teşhîso raşt rayîrê mertewala nêweşî yê ziwanê maye reyde girewtiş ra vîreno. Seba ki nêweş tewr weş û hewl ziwanê xo de derdê xo, dejê xo, tênê xo doxtorî dir şîyeno bari bikero. Tîya de tengî û leqa ziwanî werte ra wederîyena. Wexto ke klînîk de termê ki hetê nêweşîye ra fam nêbê ya zî nêweşî xo xelet da fahmkerdiş o wext nêweşîye rê zî çare nêyeno vînayene.”
Dima ra Serra Bûcak qisey kerd û vat: “Warê weşîye de pênasekerdişê ziwanê kurdkî gamêka zaf muhîm a. Kesê ke êşê xo, nêweşîya xo tewr rind bi ziwanê xo ano ziwan. No heqê her kesî yo ke bieşko warê sihetî de ziwanê xo bixebitno. Sey Rayberîyanê Herêmî ma meylanê ke her warê ciwîyayişî de ziwan gandar û çalak bibo. Ez hevî kena ke na xebate seba xebatanê bînan ê zanistiyan bibo nîmûne.”
Program bi çepikan qedîya.
