Nêweşxaneyê Gazî Yaşargîlî yê seba Amedî û heme şaristan û qezayanê herême merkezêko sereke yê weşîye yo. Welatîyê ke seba dermankerdişî bi kîlometreyan rayîr yenê, bi rojan yan zî bi hewteyan verê beranê nêweşxaneyî de manenê hem problemê cayî hem zî bi problemanê kêmîya doktoran rî bi rî manenê.
Nêweşxaneyê Perwerde û Cigêrayîşê yê Gazî Yaşargîl yê qezaya Peyasî ya Amedî ke roj 25 hezarî welatij muracat kenê, alozîya weşîye resaya asta tewr cor. Semedê kêmîbîyayîşê doktoran, ereykewtişê randevuyan û kêmanîyê cayê mendişî, nêweş û merdimê înan zehmetîya rê rî bi rî manenê. Nêweşxaneyê Gazî Yaşargîlî bi problemanê pakîye zî rojev de yo. Nêweşê ke seba dermankerdişê qeza û şaristananê bînan ra yenê, nêweşxane de probleman ciwîyene. Labelê tewlê nê probleman zî seba çareserîye gamê şênberî nêyenê eştene. Welatijê ke ameyê nêweşxane derheqê problemanê weşîye de zehmetî ancenê, rayberîya nêweşxaneyî zî girêdayê hûmara zêde yê nêweş û merdimanê înan de qisey kerd.
‘Seba randevuya MR di aşmî danê’
Welatijê bi nameyê Ejder Karamanli ard ziwan ke o qezaya Sewregi ya Riha ra seba dermankerdişî ameyo nêweşxanê û wina vat: “Nêweşxaneyê ma esto la tede doktor çin o. Ma zî mecburî ra yenê Amed, la tîya zî ma rastê eynî probleman yenê. Seba MR’êke an zî ultrasonî heta vizerî, di aşmî û nêm randevu danê. Bê randevu zî nêweşan qebul nêkenê. Eke nêweşîyêka girane yê to bibo, tu mecbûrê bi hewteyan pawe bê.”
‘Cayê roniştişî çin o, merdim serê lingan de manenê’
Mehmet Azîz Gungurur bale ante serê qelebalixê zêdeyî û kêmanîyanê warê xizmet, û vat: “Roje bi hezaran merdimî yenê nê nêweşxaneyî, la nê cayê nêweşan est o nê zî yê merdimanê înan. Seba amelîyatî erey randevu yenê dayene. Teberê nê de problemê parkkerdişê erebeyan zî esto. Dorûver pirr beno ca nêmaneno.”
Şukru Akgonul zî dîyar kerd ke xizmetî qîm nêkenê û nêweşxane kapasîteya xo zêdeyêrî bar gênê serê milê xo û vat: “Şar dûrî ra yeno, salon û korîdoran de heta dorûverê nêweşxaneyî zî merdim cayêko tede ronişo nêvîneno. Binê daran de demêko derg lingan ser manenê. Merdimê nêweşî zaf bêhal kewenê. Ganî nê şertî bêrê başkerdene û cayê musaîdî bêrê viraştene.”
‘Welatijî mebur manenê ke şorê nêweşxaneyanê taybetî’
Welatijo bi nameyê Esat Gungurur zî da zanayene ke nêweşxaneyê herême qîmê hewcedarîyan nêkenê û nê çîyî ardî ziwan: “Amed şaristanêko gird o û heme şaristanan ra nêweşî yenê tîya. Seba ke nêweşxaneyê dewlete de dore nêyena û erey manena, welatijî mecbur manenê şorê nêweşxaneyanê taybet û pereyêko zêde xerc kenê.
‘Ma eşkenê bi hemkarî û hîsgêrî çareser bikerê’
Vera gerre û reaksîyonanê welatijan, Rayberîya îdareyî ya Nêweşxaneyê Gazî Yaşargîlî zî derheqê problemê pakîye û warê vindertişî de qisey kerd. Rayberîye da zanayene ke rojane dorê 25 hezarî nêweş û merdimê înan serdayîşê înan kenê û nê çî vatî: “Her nêweşî reyde bi desan merdimê ey yenê. No qelebalix zî kapasîteya personelan ra zaf zêdeyêr a. Babeta pakîye de çi destê ma ra yeno ma kenê, la ganî kesê ke yenê tîya zî hîsgêrî bê. Tena bi pakkerdişê ma nêbeno, ganî dorûver nêro leyminkerdene zî. Bexçeyê nêweşxaneyî de adir yeno tavistene û çop yeno eştene. Wexto ke hişyarî kenê, ma ra vanê ‘Karê şima no yo, şima do pak bikerê’. Ma eşkenê bi hemkarîya yewbînî nê problemî çareser bikerê. Sewbîna tu hewcedarî bi vindertişê teberî çin a, ma salona mendişî viraşta la çi heyf ke cayê salone de verê beran û tebera vindertiş yeno tercîh kerdene.”
