Hemşaredara Bajarê Pîlî ya Wanî Neslîhan Şedal ke qeyûm vera ci tayînî bî, dîyar kerd ke senî qeyûm ame projeyê cinîyan betal kerdî û vat: “Sîyasetê qeyûmî û rejîmê qeyûmî do bi têkoşînê cinîyan vîndî bikero.”
Tayînkerdişê qeyûmî yê semedê şaredarîya Bajarê Pîlî ya Wanî, aşmêke derbaz bî û pêro projeyê ke hemşaredaran plan kerdibî, hetê qeyûmî ra ameyî betalkerdiş. Projeyê JINKART, Qertê Paştîdayîşê Komelî yê semedê cinîyanê feqîran, projeyê tesîsê komelî yê berardiş û komelbîyayîşî, projeyê wareyê kultur, ciwan, cinî, îmar, awe, rayîr û kanalîzasyonan de ameyî betalkerdiş.
Hemşaredar Neslîhan Şedal ke qeyûm vera ci tayîn bî, derheqê babete de qisey kerd.
‘Ma xeylêk proje ca ardî’
Neslîhan Şedal da zanayîş ke hîrê demî yo Kurdîstan de îradeyê şarî yeno xespkerdiş, bi destê qeyûman pêro bîyayîşê cinîyan yeno hedefgirewtiş. Neslîhan Şedal wina vat: “Zîhnîyetê serdest yê camêrdî her tim destkewte û bîyayîşê cinîyan hedef girewto. La hemverê nê de têkoşînî cinîyan her tim pîl bî. Ma zî sey têgêrayîşê cinîyanê kurdan, tîya bi perspektîfê azadîya cinî, ekolojîk û demokratîkî xeylêk xebatî ca ardî.”
‘Ma ewilî planê stratejîk awan kerd’
Neslîhan Şedal dîyar kerd ke qeyûman sîstemê hemserekî hedef girewto û wina vat: “Ma bi perspektîfê azadîya cinî, demokratîke û ekolojîk xeylêk xebatî kerdî. La qeyûmî ameyî û ewil nê projeyî vindarnayê. Wexto ke ma ameyî îdarekarî ma şaredarîya cinî aver berd û ma waşt ke bikerê komelî. Yewin çîyo ke ma kerd awankerdişê plansazîyê stratejîk yê cinî bi. Ma bi STK, dînamîkê cinîyan, komele û platformê cinîyan dir nê qerarî da.”
‘Ma bi astengîyan reyde rî bi rî mendê’
Neslîhan Şedal tewr peyên wina vat: “Qeyûman cinîyan mahkumê hawirê şîdetî kerdbî. Îstasyonê hetkarî ra bigîrê heta xeta Alo Şîdetî, merkezê cuye yê cinîyan, wareyê berardeyê cinîyan, koperatîfê cinîyan amebyî padayîş. Wexto ke ma ameyî, ma hewlda ke ma akerê la ma astengîyanê burokratîkan reyde rî bi rî mendê. Qeyûmî senî ameyî projeyê JINKART ke ma bica ardêne, betal kerdî. Sewbîna projeyê ma yê Sosyal Kart est bî. Ê zî betal kerdî. La ma vanê ke do rejîmê qeyûmî bi têkoşînê cinî vîndî bikero. Ma cinî nê qebûl nêkenê û ma do têkoşînê xo bidomnê.”
