Nebî Yavûzî, serra 2023î de badê 30 serrî û 6 aşman hepîsxane ra ame veradayene. Nebî Yavûzî ke kanserê pankreasî ver nêweşxaneyêko tede ameyenê tedavîkerdene de cuya xo ra bî.
Nebî Yavûzî, serra 1993î de qezaya Nisêbîn a Mardînî de ame girewtene, hetê Mehkemaya Ewlekarîya Dewleti (DGM) ya Amedî ra bi cezaya muebbetî amebî cezakerdene. Nebî Yavûz hepîsxaneyanê Mardîn, Amed, Edene, qezayanê Vezîkopru û Bafra yê Samsûn de ame tepîşîyayîş.
Nebî Yavûzî cezaya xo temam kerdibi, ganî sibata 2023î de biameyni veradayene la veradayîşê ey hetê Meclîsê Muşahedeya Îdarî yê Hepîsxaneyî ra 6 aşmî ame dergkerdene. Nebî Yavûz, badê 30 serrî û 6 aşman, 5ê temmuza 2023î de Hepîsxaneyê Tipê M’yî yê Bafra ra ame veradayene.
Nebî Yavûzî, badê veradayîşî, dest bi kontrolanê weşîye kerdibi û teşhîsê kanserê pankreasî ey ame kerdene. Yavûzî ke demêko keyeyî de tedawîya ey dewam kerdêni, nêzdî di aşmî rewşa ey xirabe bî û o berd bî Nêweşxaneyê Tewqîfî yê Qoserî.
Ame dîyarkerdene ke nêweşîya Nebî Yavûzî qonaxa çarine ya kanserê pankreasî ya. Yavûzî, ke tedawîya ey nêweşxaneyî de dewam kerdêne, saetanê serê sibayî cuya vîndî kerd. Cenazeyê Nebî Yavûzî do badê kar û baranî dînî, dewa Sitîlîlê ya girêdayeya qezaya Nisêbînî de bêro defînkerdene.
‘Serkewtiş do yê ma bo’
Nebî Yavûzî, wexta ame veradayene, verên şîyi hetê keyeyê xo yê Îzmîrî û tepîya agêra welatê xo. Yavûzî qiseyê xo yê badê veradayîşê xo da de wina vatibi: “Tarîxa ma ya têkoşînî yê 50 serran, bi des hezaran kesan ra dewam kena. Têkoşînê ma bi kede û xoverdayîşê şarî gird beno. Girewteyan de zî na hêvî û bawerî, ma ser lingan de verda, hêz dayo ma. Bi têkoşînê ke ameyo dayene serê mi berz o û ez pê serfiraz a. Serkewtiş do yê ma bo.”
