Sewregij Ezîz Karamanli ke bi serran o şiwanetîya malê xo keno, emser newe malê xo ardo koyanê Dêrsimî. Weyekerdena malî û tenga ke teyrê aye ser o wina vano: ”Ca çin o ke şîme mîyanê xo biçîraynîme, kes paştî nêdano ma, seba nanê xo yenîme nê waran, no kar pîy û kalikanê ma ra mendo.”
Ezîz Karamanli qezaya Riha, Sêwregi ra yo û bi serran o ke şiwanetîya malê xo keno. Serranê verênan de malê xo berdo koyanê Erziromî, koyanê Çewlîgî, emserr newe malê xo ardo koyanê Dêrsimî. Hetanê payîzo peyên malê xo nê koyanê Şoraqî yê ke girêdayeyê qezaya Pulemurîye, uca de çirneno.
‘No kar pîy û kalikanê ma ra mendo’
Keyeyê Ezîz Karamanli debarê xo weyekerdişê heybanê zafane zî mîyan ser vîneno. Weyekerdişê malî û tenga ke teyrê aye ser wina vano: ”Ma verênde şîyêne koyanê Erziromî û Çewlîgî emser ameyme koyanê Dêrsimî. Ca çin o ke şîme mîyanê xo biçîraynîme, kes paştî nêdano ma, seba nanê xo yeme nê waran, no kar pîy û kalikanê ma ra mendo.”
‘Cayê ma çin o her serre ware vurnenîme’
Ezîz Karamanli qiseykerdîşê xo wina domneno: “Şarê Dêrsimî dewa xo ra vejîye, waranê înan de kes çin o. Pêro şîyê teber. Karê ma zaf giran nîyo, teyna cayê ma zêde çin o û zaf rey kes ca nêdano ma, dewlete zî paştî nêdana ma. Ma şande saete panc de mîyan benîme çîraynenîme, pesew ko de manenîme, sodîr saete newîne de mêşinî anîme doşenîme. Ê yê ke yenê nê koyan pêroyê înan cîranê ma yê. Seba nanê xo ma nê karî kenîme. Şiwaneyê tayîne est ê, yê ma çin ê. Ma qaytê mêşinanê xo kenîme. Emser vewre zaf varaye û waran de çere zaf o. Şewe û roj malî tede çiraynenîme. No welat tena serdin o aye ra malê ma rê rind yeno.”
