Keyeyo ke mezelê gedeyê înan ê HPG’yî ameyê şiknayene, do muracatê ÎHD û Baroyî bikerî. Keyeyan dîyar kerd ke hem mezelî şikitê û hem zî vat, “Ma do terorîstan na dewe ra vejê. Ma do bi kepçeyan mezelanê înan birijnê û şima dewe ra vejê.”
Keyeyê Mert, Vedat, Sedat, Eshaf, Sefkan Mert 1ê tebaxe de dewa Xişoke ya qezaya Kanîreşî ya Çewlîg de hêrişê goranê endamanê HPG’yî Meryem Mizgîn û Mahîr Mertî şikitê û dima keyeyê endamanê HPG’yî tehdît kerdî. Endamê keyeyê Mert ê ke hêrişê mezelan kerd, leşkeran het de vat, “Nê armenî yê. Ma do terorîstan û mezelanê înan na dewe ra vejê. Ma do bi kepçeyan mezelanê înan hewanê û înan dewe ra vejê.” Keyeyê endamanê HPG’yî dîyar kerd ke do muracatê ÎHD û Baroyê Çewlîgî bikerê.
Derheqê hedîse de Nevzat Mert, datîzaya endamanê HPG’yî Meryem Mizgîn û Mahîr Mertî yo, îfade kerd ke 30ê temmuza 2025î de merdimanê înan dewa Heznaw û Xişok ê girêdayeyê Kanîreşî seba hêgayan hêrişê înan kerdo û wina vat: “1ê tebaxe de Sevkan Mert, Eshat Mert, Vedat Mert, Sedat Mert bi emrê Ahmet Mert û lajê ey o kardayox Fesîh Zekî Mert ke xo weçinitişî de partîya DEVA de namzet nîşan dabi, hêrişê mezelanê şehîdan kerd. Seba ke ma o wext raya xo nêdaye ey, êdî kerd rike. Verê ke hêrişê mezelan bikerê, mabênê ma ded di hewte ra ver seba hêgayan pirodayîş bibi. Leşkerî ameybî dewe û mabênê ma de bîyê. No hêriş çimanê leşkeran ver de ame kerdene. Ma rîyê zilmê dewlete ra 15 serrî ra ver şîyê Ewropa. Ma hêqayê dayê dewijêko feqîr ke debara xo bikero. La datîzayê ma şîyê qereqol vat, ‘Birayê ey mîyanê terorîstan de ameyo kiştene. Seba ke ez nêşîya cenazaya birayê ey coka ma dayo pêro.” Şi qereqol de ajanî kerde. Hedîse ra pey leşkeran het de tehdîtê sey ‘Ma do înan dewe ra vejê. Ma do kepçe bîyarê mezelanê înan birijnê’ ma rê kerdî. Par zî hêriş kerdbi.”
Nevzat Mertî îfade kerd ke înan seba hetkarîya înan bikerê hêgayê dayê înan la seba ke tapuyê hêgayan nêdayê merdiman xo hêriş kerdo û vat: “Ma ewro vera nê bêveng bimanê do siba hêrişê mezelanê bînan zî bikerê. Do seranserê welat de tradîsyonêko lêmin dest bikero. Ma do muracatê ÎHD’yî bikerê. Ma do muracatê Baroyan bikerê. Hêrişê vera erj û rûmetanê şarî nêyeno qebulkerdene. Rijnayîşê mezelan zîhnîyetê DAÎŞ’î yo. Ganî no zîhnîyet bêro mehkumkerdene.
