Hemsereka DBP’yî Çîgdem Kiliçgun Ûçar û Sekreteryaya Îmrali ra Veysî Aktaşî Mîtîngê Azadîye yê Amedî de qisey kerd, vat: “Şerto verên ê çareserîya demokratîke azadîya fîzîkî ya Rayber Apoyî ya. Tecrîd çare nîyo. Ma muzakereyê demokratîkî û haştîya birumete wazenê.”
Meydanê Îstasyonî yê Amedî de semedê azadîya fîzîkî ya Rayber Apoyî bi şîarê “Bi Rayberîya Azade Ver Bi Komelê Demokratîkî” Mîtîngê Azadîye ame organîzekerdene. Amed û bajaranê dormeyî ra bi hezaran kesî tewrê ci bîyî. Hîrê hetan ra şar kewt warê mîtîngî, ciwanî bi sloganan û govendan kewtî warî.
Hemserekê DEM Partî yê Amedî Abbas Şahînî qiseykerdişê bi nameyê komîteya hazirkerdişê mîtîngî de ard ziwan ke mîtîng bi îradeyê hemparî û hêvîya azadîye yê şaran ame viraştene û vat komelo demokratîk sîstemêko ke şarî tede bi ziwan, nasname û kulturê xo azad ciwîyenê.
Hemsereka DPByî ya Amedî Ruçem Vefa Elyakute zî vat ê bi waştişê azadîya fîzîkî ya Rayber Apoyî û azadîya şarî ameyî têhet.
Hemsereka Pêroyî ya DBP’yî Çîgdem Kiliçgun Ûçare zî ard ziwan ke vengdayîşê 27ê sibate têna seba kurdan ney, seba hema şaranê Tirkîya yo û bale ante muhîmîya cuya hempare û yewîya demokratîkî ser. Ûçare vat gerek rolê Rayber Apoyî yê prosesê muzakereyan bigêrîyo binê temînatê huqûqî û veng da ke gerek gamê huqûqî yê ke semedê çareserîya demokratîkî hewce kenê, cade bêrê eştene.
Sekreteryaya Îmrali ra Veysî Aktaşî zî ard ziwan ke Rayber Apo îradeyê haştîye, demokrasî û azadîye yê şaran o û vat tecrîd çare nîyo. Aktaşî îfade kerd ke gerek şertê muzakereyan bêrê caardene û vat: “Ma haştîya birumete wazenê. Ma çareserîya demokratîke wazenê. Ma do destur mendê teslîmîyet sey çareserî bêro teqdîmkerdene. Aktaşî îfade kerd ke azadîya Rayber Apoyî azadîya şaran a û waştişê çareserîya demokratîke û ameyoxê seypêyî newe kerd.
Badê qiseykerdişan mîtîng bi deyîranê hunermendan û govendan dewam kerd.
