Endamê Heyetê Îmraliyî Mîthat Sancarî Konferansê ‘Tirkîya de Prosesê Aştîya Komelî û Nimûneyê Dinya’ de qisey kerd û bale ante pozîsyonê Abdullah Ocalanî yê prosesê çareserkerdişî ser û ard ziwan ke ‘Qanûnê Çarçewa’ de naskerdene û diyarkerdena rolê ey şertêko bingeyîn o.
Parlamenterê Partîya Têduştî û Demokrasî ya Şaran (DEM Partî) û Endamê Heyetê Îmraliyî Mîthat Sancar, roniştişê verên ê konferansê ‘Tirkîya de Prosesê Aştîya Komelî û Nimûneyê Dinya’ de qisey kerd û bale ante munaqeşeyanê neweyan ê derheqê çareserkerdişî ser û diyar kerd ke nameyê ke nîyeno prosesî ser, muhtewaya karê ke yeno kerdene de rasterast tesîr keno û wina vat: “Seba ma no Prosesê Aştî û Komelê Demokratîkî yo. Tena bi konseptê ‘terorî’ pênasekerdişê babete, guman, fikar û şikanê serê niyetî gird keno û nîşan dano ke proses bi eksenê asayîşî yeno rayraberdene.”
Mîthat Sancarî dîyar kerd ke no proses nimûneyanê bînan ê dinya ra cîya yo û wina dewam kerd: “Taybetîya tewr girde yê nê prosesî nimûneyanê dinya ra cîya keno no yo ke qonaxê çekveradayîşî bîyo destpêkê prosesî. Vengdayîşê 27ê sibatî tena seba qedênayîşê şerî nîyo, esasê ci awankerdişê bingeyê çareserkerdişî yo. Coke ra nameyê vengdayîşî bi xo mesaj dano ma: Prosesê Aştî û Komelê Demokratîkî.”
‘Proses serê bawerî de ney garantîyan ser awan beno’
Mîthat Sancarî dewamê qiseykerdişê xo de serê munaqeşeyê ‘Qanûnê Çarçewa’ û prosesê Bêçekkerdiş, Fesihkerdiş û Entegrasyonî de vindert û nîşan da ke nê munaqeşeyî seba înan babetêka asane nîyê û ard ziwan ke qanûno ke yeno pawene ganî seba çekveradayîş û entegrasyonî mekanîzmayanê eşkere û ewle bîyaro û nê çîyî vatî: “Ganî qanûn pêroyî û hîra bo. Eke şima tayê hetan teber de verdê û tayê bînan bikrê çarçewa ser, no yeno a mana ke şima meseleya çekveradayîşî cidî nêgênê. Eynî wext de, vûriyayîşê şîdetî ra ver bi siyasetî zî bingeyê nê qanûnî yo. Merdim nêşêno bifikirîyo ke wexto ke çekî ronîyayî, do hedefê siyasî zî hete ke de bêrê veradayene. Merdimê ke bawer kerd bi rayanê demokratîkan nêresenê meqsedê xo, serê danê metodanê bînan ra. Ewro vûriyayîşê metodî rojev de yo. Coke ra, îmkanê siyasetê azad û demokratîkî parçeyêko bingeyîn ê qanûnî yo. Ganî ma bizanê ke nê prosesî serê bawerîye de ney, serê garantîyanê huqûqîyan de awan benê.”
‘Ganî rolê Birêz Ocalanî qanûn de bêro dîyarkerdene’
Sewbîna Mîthat Sancarî dîyar kerd ke madeyê tewr krîtîkan ê qanûnî ra yew zî dîyarkerdena pozîsyon û rolê Abdullah Ocalanî yo û qiseykerdişê xo wina qedêna: “Beno ke tayê merdimî sey serekê muzakereyî qebûl nêkerê û îtiraz bikerê. La eke ma bi rastî wazenê no şero giran o ke birînê girdî akerdê biqedîyo, ganî ma na rastîye bivînê: Raya nê prosesî rasterast hetê Birêz Ocalanî ra ameya akerdene. Teberê ey de tu kesî nêşkayene vengdayîşê babetêka wina bikero û tesîr serê nê qerarî de bikero. Coke ra qanûn de naskerdene rolê ey, waştişêke goreyê xozaya prosesî ya. Ganî rolê ey bi fermî bêro naskerdene.”
