Komeleya Cigêrayîş û Averberdişê Ziwan û Kulturê Mezopotamya (MEDÎA-DER) qezaya Çerkezkoyî ya Tekîrdagî de kongreya xo ya adetî ya diyîne viraşte. Kongre de ame vatene ke seba şarê kurdî pawitişê ziwanê maye wayîrê yew muhîmîye û hewcebîyene ya cuye yo.
Komeleya Cigêrayîş û Averberdişê Ziwan û Kulturê Mezopotamya (MEDÎA-DER) qezaya Çerkezkoyî ya Tekîrdagî de kongreya xo ya adetî ya diyîne viraşte. Parlamenterê DEM Partî yê Agirî Sirri Sakik û temsîlkarê xeylêk dezgehê komelê sîvîlî yê herêmî bi kincê kurdkî tewrê kongre bîyî ke bînaya komeleye de ame kerdene. Kongre de seba kesê ke têkoşînê azadîye de cuya xo vîndî kerda, rêz ame girewtene.
Cayê kongre de pankartê “Statuyê Kurdkî Perwerdeyê Kurdkî” û “Ziwanê Kurdkî Xeta ma ya sûr a” ameyî aleqnayene. Kongre de aktîvîstê ziwanê Kurdkî Cevdet Zîlanli û parlamenterê DEM Partî yê Agirî Sirri Sakikî qisey kerd. Cevdet Zîlanlîyî destpêkê qiseykerdişê xo de şehîdê têgêrayîşê azadîya Kurdîstanî yad kerdî û nê çîyî ardî ziwan: “Gere hewl bêro zanayene ke pêro waştiş û xeyalê şehîdanê Kurdîstanî bêguman do bêrê ca û cuya ke bi heybet do bêro awankerdiş. Ewro, aştî û aramî bi saya xebat û hewldayîşanê şima do pêk bêro. Pawitişê ziwanê ma yê maye seba ma wayîrê yew muhîmîya gird a. Nê şer û zilmê ke 50 serrî yo dewam keno de, fedakarîyê girdî ameyî kerdene û kedêka girde ameye dayene. Ewro, nê sewîyeyî de, goreyê paradîgma û felsefeya ma xeylêk wayîrvejîyayîşê ziwan û kulturê xo, seba şarê kurdî heyatî yo. Ma Apê Musa Anterî, reyde pêro şehîdanê Kurdîstanî bi hûrmet yad kenê. Bi sozê ke tîya de ameyî dayene, qelema Apê Musa Anterî ewro destê bi seyan kesan de ya û resena zîrveyî.”
‘Wa gamê hewceyî bêrê eştene’
Dima Sirri Sakikî qisey kerd û dîyar kerd ke ê 50 serrî yo mîyanê şer û pêkewtişan de bîyî pîl, seba ziwan û nasnameyî bedêlê erjayeyî dayê û wina va: “Ewro ma seba statuyê ziwanê Kurdkî tîya de yê. Kurdan seba kultur û ziwanê xo bedêlêko zaf giran da. Înan vatêne ke ê ma nêşinasnenê, labelê ma israr kerd ke ma est ê û ma do estbîyayîşê xo bidomnê. Şerêko 50 serran ame rayaberdene, mîyanê ê şerî de ma qet şehîdê xo tena nêverdayî. Bi hezaran merdimî qetil kerdî û dewe vêşnayî. Ewro kurdî hem Tirkîya de û hem zî Kurdîstan de bi serberzî xo ver danê û seba heqanê xo têkoşîn kenê. Yew proses esto ke di serrî yo dewam keno; prosesê aştîye. Ma do qanî bibê ke heq û statuyê qanûnî yê kurdan yeno pawitene. Çekî ameyî ronayene. Rayberê Şarê Kurdî Abdullah Ocalanî zî vatbî ke vengê çekan do bêro birnayene. Labelê, Tirkîya tu game nêerzena; qanûnêk ame vetene la hema nêamo caardene. Ganî heta nika pêro tepişteyî ameyêne veradayene û ê ke surgun de yê zî bieşkê agêrê. Labelê tu game nêameye eştene û ma reyna vanê, êdî wa gamê hewceyî bêrê eştene.” Badê qiseykerdişan weçînayîş virazîya û Aysel Hozan û Recep Denîz bîyî hemserekê neweyî yê MEDÎA-DER’î. Kongre bi govendê qedîya.
