Şirnax– Keyeyê şehîdan û welatijê ke tewrê vîrardişê Cizîre bîyê, dîyar kerd ke cangorîyê Têgêrayîşê Azadîye şehîdê înan hemînayê û ê do xeyalanê şehîdanê xo bi ca bîyarê.
Vîrardişê ke seba şehîdanê Têgêrayîşê Azadîye, qezaya Cizîre ya Şirnexî de virazîyeno, roja hîrêyine de dewam keno. Roja destpêkê ra heta nika, bi des hezaran welatijî seba wayîrvejîyayîşê cangorîyanê azadîye cayê vîrardişî veng nêverda.
Keyeyê şehîdanê ke vîrardişê seba înan yeno virazîyayene û welatijê ke tewrê vîrardişî bîyî, derheqê şehîdan de fikrê xo ard ziwan. Keyeyê şehîdan îfade kerd ke şehîdî tena şehîdê înan nîyê û ê bi şehîdanê xo serberz ê. Keyeyê şehîdan dîyar kerd ke ê do rêçê şehîdanê xo ser o bê û tu wext nêverdanê ke beyraqê ke înan berz kerda, bikewo erd.
Welatijê ke hîrê rojî yo ke seba piştîdayîşê keyeyê şehîdan yenê vîrardişî zî îfade kerd ke ê heme şehîdan sey şehîdê keyeyê xo vînenê û ê do tu wext fek xeyalanê şehîdanê xo ra veranêdê.
‘Ganî Abdullah Ocalan endî mîyanê şarê xo de bo’
Keyeyê şehîdan û welatijê ke tewrê vîrardişê bîyî, vengdayîşê rayedaran kerd ke ganî Rayberê Şarê Kurdî Abdullah Ocalan û pêro girewteyê azadîye serbest bêrê verdayene. Welatijan waşt ke ganî endî Rayberê Şarê Kurdî Abdullah Ocalan mîyanê şarê xo de bo û bieşko tewrê heme xebatanê şarê xo bibo.
