‘Konferansê Aştî û Entegrasyonê Demokratîkî’ o ke do 29-30ê êlule de London de bêro viraştiş, do problemê kurdan, tecrubeyanê çareserîya şer û aştîye yê herêmanê cîya yê dinya bêro erjnayîş.
Paytextê Îngilîstanî London do seba konferansêk mêmandarîye bikero ke çareserîya sîyasî û demokratîk ê probleê kurdan û prosesanê aştîye yê mîyanneteweyî tede bêrê erjnayîş.
Konferans do hetê Centre for Kurdish Affairsî ra, 29-30ê êlule de Hamilton House de bi nameyê “Konferansê Aştî û Entegrasyonê Demokratîkî” bêro viraştiş. Xeylî sîyasetmedaranê kurdan, akademîsyen, rojnamegêr, temsîlkaranê komela sîvîl û pisporê ke prosesanê aştîye yê welatanê cîya-cîyan de ca girewtê, do tewrê konferansî bibê.
Wezîrê Karanê Teberî yê Îngilîstanî yê verêne û Hetkarê Serekwezîrî David Lammy, parlamenteranê Partîya Karkeran Catherine West û Bambos Charalambous zî dîyar kerd ke ê piştî danê amancanê konferansî.
Tecrubeyê aştîye yê dinya do bêrê erjnayîş
Roja destpêke yê konferansî do prosesanê aştîye yê Îrlanda Bakurî, Kolombîya, Efrîkaya Başûrî, Welatê Baskî, Katalonya û Tîrola Başûrî bêrê erjnayîş.
Sernameyê muzakere û dîyalogê sîyasî, derbasbîyayîşê şerî ra ver bi sîyasetê demokratîk, bêçekbîyayîş, newe ra entegrasyon, parekerdişê wezîfeyan, xoserî û garantîyanê qanûnê bingeyî do bi tecrubeyanê welatanê cîya-cîyan ser o erjnayîşî bêrê kerdiş.
Victoria Sandino, ke tewrê prosesê aştîye yê Kolombîya bîya, do bi rayîrê vîdeoyî mesajêk konferansî rê bierşawo.
Roja dîyine de do tena poblemê ser o erjnayîşî bêrê kerdiş
Roniştişanê 30ê êlule de, do yewser hetê sîyasî, huqûqî, komelkî û herêmî yê problemê kurdan bêrê erjnayîş.
Tewlê munaqeşeya ameyoxê sîyasetê kurdan ser o, temsîla demokratîk, rayberîyanê şaristanijan û rolê komela sîvîl û dîaspora sewbîna do hedîseyê Tirkîya, Sûrîye, Iraq û Îranî yê kurdan ser o zî erjnayîşî bêrê kerdiş.
Programî de sewbîna do rolê cinîyan ê prosesanê aştîye de, tewrbîyayîşê mînorîtan, heqê merdiman, azadîya çapemenîye û pêkerdişê komelkî bêrê erjnayîş.
Tewlê Pervîn Buldan, Gultan Kişanak, Gulistan Kiliç Koçyîgît, Serpîl Kemalbay û Osman Baydemîr û do xeylî akademîsyen, rojnameger û pisporê prosesanê aştîye yê mîyanneteweyî konferansî de hedre bibê.
Aştîya domdare senîn eşkena bêro awankerdiş?
Koordînatora Centre for Kurdish Affairsî Nejla Arî dîyar kerd ke amancê konferansî no yo ke tecrubeyê aştîye yê welatanê cîya-cîyan bi tecrubeyanê sîyasî yê kurdan rê heman platformî ser o biresnê yewbînan.
