Sekretera Yewîya Cinîyanê Herêma Kurdîstanî Leyla Abdullah da zanayene ke mesajê melayan ê huşkî cinîyan ser o benê sebebê zilmî û vat: “Ganî cinîyê ke benê parlamenter, bibê wayîrê projeyanê seba cinîyan û hemverê qanûnanê vera cinîyan de vinderê.”
Herêma Kurdîstanî de roje bi roje zilmo vera cinîyan vêşî beno. Goreyê daneyanê ke hetê ajansê RojNews’î ra ameyê komkerdene, 5 aşmanê emserrî de 14 cinî Başûrê Kurdîstanî de ameyê kiştene û 10 cinî zî bi hewayêko guman cuya xo vîndî kerda. Rixmê nê zî ne hukmato verên yê Herêma Kurdîstanî ne zî sazgehê ey vera zilm û kiştişan veng nêvejenê.
Sekretera Yewîya Cinîyanê Herêma Kurdîstanî Leyla Abdullah derheqê babete de ajansê RojNews’î rê qisey kerd.
Sekretera Yewîya Cinîyanê Herêma Kurdîstanî Leyla Abdullah destpêkê qiseykerdişê xo de da zanayene ke problemê komelkî yê sey şerefî sebebanê zilmê vera cinî ra yew ê û wina dewam kerd: “Sebebanê xeylê cîyayan ra cinî yenê kiştene û hûmara înan yena nimitene. Daneyê kiştişê cinîyan 6 aşmî û serre de reyêk hetê Rayberîya Zilmûtujîya Keyeyî ra yenê vilakerdene. Goreyê daneyan serra 2010î ra heta 2020î Herêma Kurdîstanî de 490 cinî ameyê kiştene. Serra 2024î ra heta sibata 2025î de zî goreyê daneyan 48 cinî ameyê kiştene.”
‘Mesajê huşk ê benê sebebê kiştişê cinîyan’
Leyla derheqê mesajanê melayan û tesîrê ê mesajan cinîyan ser o zî vat: “Mesajê hişk ê melayan tesîrê xo camêrdan ser o kenê û benê sebebê kiştişê cinîyan û xirabbîyayîşê rewşa keyeyî. Seba ke rixmo ke cinî wayîrê heme berpirsîyarîyanê pîl a zî reyna asta diyîne de yena vînayene. Ganî cinî asta yewine de bêrê vînayene û seba bedilîyayîşan zî perwerdeyê keyeyî muhîm o. Nê reyde zî rêxistinê cinîyan eşkenê qanûnanê vera cinîyan û gedeyan ser o zor bidê hukmatî.”
Dewamê qiseykerdişê xo de Sekretera Yewîya Cinîyanê Herêma Kurdîstanî Leyla Abdullah bale ant cinîyan ser o ke weçînitişan de yenê weçînitene zî û vat: “Seba ke bieşkê babeta cinîyan bikerê rojeve, demê weçinitişan de seba cinîyan rayî yenê dayene. Seba ney zî lazim o cinîyê ke şonê parlamento, bibê wayîrê projeyanê seba cinîyan û hemverê qanûnanê vera cinîyan de vinderê. Nê reyde zî cinîyanê çalakvan û rêxistinanê cinîyan reyde, şaristan û şaristanokan de çalakîyan bikerê. Awankerdişê komelêko averşîyayox, merkezanê perwerdeyî de beno. Ganî seba wendekaran semîner bêrê dayene. Bi taybetî zî ganî semînerî seba camêrdan bêrê dayene ke haydar bibê.”
Tewr peyên Leyla behsê astengîyanê demê karî de yenê vernîya cinîyan kerd û wina vat: “Warê komelî de vera cinîyan astengî qewimîyenê û xeylê reyan nêverdanê cinî biresê amancê xo. La seba çareserkerdişê problemanê cinîyan do her tim karê ma dewam bikero.”
