Amed – Sînemagerê ke Salona Konferansî ya Şaredarîya Şaristanê Neweyî de ameyî têhet, astengîyê vernîya sînemaya Kurdî û ameyoxê aye munaqeşe kerdî û vatî: “Çareserî bi yewbîyayîş û bi aqilê kolektîf yena.”
Komxebata ke bi rayberîya Akademîya Sînemaya Rojhêlatê Miyanênî yena rayraberdene, bi tewrbîyayîşê xeylê rejîsor, kayker û nuştoxanê ke Kurdîstan û Tirkîya ra ameyê, dest pêkerd. Destpêkê komxebatî de sînemagerê ke têkoşînê hunerî de ganê xo vîndî kerdê, bi hurmet ameyî vîrardene.
‘Ganî ma bi ziwanê xo sînema bikerê’
Qiseykerdişê akerdişî de sînemager Aram Dildarî bale ante serê zehmetîyanê sînemaya Kurdî û vat: “Ma do naye ser o munaqeşe bikerê ke ma do senî bi ziwanê xo yê dayîke sînema bikerê. Sewbîna ma do serê naye de vinderê ke senî eşkenê sînemaya Kurdî bikerê wayîrê sazgehî û rêxistinêko bihêz.
‘Çareserî bi aqilê kolektîf bena’
Aram Dildarî vîr vist ke ziwanê Kurdkî serranê dergan binê qedexeyan de bîyo û na raye de berdêlê giranî ameyê dayene. Aram Dildarî bale ante serê muhîmîya awakerdişê zemînêko hempar û wina dewam kerd: “Eke problemê sînemaya Kurdî estbê, nê problemê ma pêrune yê. Çareserî zî bi yewbîyayîş û bi aqilê kolektîf pêk yena. Amancê ma no yo ke ma bi na xebate, model û rayanê çareserîye yê ver bi averberdişê sînemaya Kurdî bi hawayêko rêxistinkerde diyar bikerê.” Qiseykerdişê akerdişî ra dima, şêwirî verê çapemenîye rê ameyî girewtene û xebatê komîsyonan ê serê astengî û çareserîyanê sînemaya Kurdî dest pê kerdî.
