Komîsyonê Neteweyî yê Cigêrayîşanê Binpaykerdişê Heqanê Merdiman eşkera kerd ke Yemen de zafêrê 790 cinî ameyê kiştene, bi seyan kesî birîndar bîyê û bi desan cinî zî rastê destbendkerdişanê keyfî û şîdetê cinsî ameyê.
Yemen de riyê şero ke bi serran o dewam keno, dejê ke cinî vînenê her ke şono xorînêr benê. Raporê heqanê merdiman, kiştiş, hêriş, remnayîş û girewtişê merdiman ê bi hewayêko keyfî, merkezanê destbenkerdişî de hêrişî zayendî, bi hezaran binpaykerdişanê sîstematîk ê ameyê belgekerdene, anê çiman ver.
Komîsyonê Neteweyî yê Cigêrayîşanê Binpaykerdişê Heqanê Merdiman ê Yemenî 8ê kanûne de kampanyaya ‘Aktîvîteyê 16 rojan ê Vera Şîdetî ke Cinîyan rê Yeno Kerdene’ eşkerayîyêka hemwexte weşanaye. Daneyê rojane yê derheqê sucanê vera cinîyan pare kerdê.
Eşkerayîya komîsyonî de ame dîyarkerdene ke şîdetê vera cinîyan êdî hedîseyanê şexsî ra vejîyayo, riyê şer û çinbîyayîşê mekanîzmayanê pawitişî û qelsbîyayîşê hesabdayîşê huqûqî bîyê parçeyêkê zilmê rojan.
Eşkerayî de ame dîyarkerdene ke riyê xirabbîyayîşê rewşa merdimîye û heqanê merdiman, cinîyê Yemenî, mîyanê pirodayîşan de bêpawitiş mendê.
Cinî benê hedefê hêrişan
Eşkerayî de behsê daneyanê Yemenî yê derheqê binpaykerdişê vera heqanê cinîyan ame kerdene û ame dîyarkerdene ke zafêrê 790 cinî ameyê qetikerdene, nêzdîyê 1490 cinîyî zî birîndar bîyê. Hedîseyê encamê şîdetê vila bîyê û bi astengîyanê domdare biencam bîyê, 218 cinî bi hewayêko keyfî ameyê girewtene yan zî bi zorê ameyê vîndîkerdene, 208 cinî riyê mendeyanê teqemenîyan, hêrişê mayînan vera wesayîtan merdê yan zî birîndar bîyê.
Sewbîna ame dîyarkerdene ke daneyî tena hûmar nîyê, îsbato zelal o ke cinîyan keno hedef û ney rê mudaxeleya lezgîne lazim a, seba ke hesabnêdayîş, teşwîqê domnayîşê binpaykerdişan o û cinî û gedeyê kênekî qada pirodayîşî de pawitişî ra bêpar mendê, no zî bîyo sebeb ke hîna zaf dej biancê.
Vengdayîş ame kerdene
Komîsyonî vengda rayedaranê eleqedar, sazgehanê neteweyî û mîyanneteweyî ke cipersayîşê cidî bêrê destpêkerdene û berpirsîyarê binpaykerdişan bêrê cezakerdene. Eynê wextî de ame waştene ke ganî cinîyî ke bi hewayêko keyfî ameyê girewtene, bilez veradîyê, seba yê bînan zî pawitişo psîkolojîk û huqûqî bêro kerdene.
Eşkerayî de ame dîyarkerdene ke heme hedîseyî ke ameyê belgekerdene, cipersayîşanê hîra reyde dest pêkerdê û seba kesanê ke binpaykerdişan kenê, kirarê huqûqî bêrê destpêkerdene.
