Koordînasyonê KJKyî eşkerayîya xo ya 25ê Teşrîna Peyêne de vat: “Bi rêxistinbîyayîşê cinîyan ê vera şîdetî nika wextê xopawitişî yo!” û venga cinîyan da ke têkoşînê hemparî berz bikerê.
Koordînasyonê Komelê Cinîyanê Kurdîstanî (KJK) bi sebebê 25ê Teşrîna Peyêne Roja Têkoşînê Mîyanneteweyî yê Vera Şîdetê Vera Cinîyan eşkerayîya nuştekî daye. KJKyî bale anta muhîmîya pêtkerdişê rêxistinbîyayîş û yewîya cinîyan a vera şîdetê camêrdserdestî ser o û vat ke Prosesê Haştî û Komelê Demokratîkî do seba beşdarîya azade û têkoşînê azadîye yê cinîyan îmkananê neweyan bivirazo.
Eşkerayîya KJKyî wina ya:
“Şîdetê vera cinîyan tu seserre de hende xorîn û sîstematîk nêameyo ramitene. Vatişê ‘vinde’ yê vera şîdetê camêrdserdestî ke asteyanê tersnayoxan de vejîyeno û her aşme, her roje û her deqîqeya serre de vila beno, resayo asteyêko bêçare. Na mana de vera qirkerdişê cinîyan, qirkerdişê cuye û qirkerdişê komel û xoza ke modernîteya kapîtalîste û turevê aye ke temsîlkerê sîstemê kastîk ê qatilî yê seserra ma yê, awan kerdo û heme hucreyanê cuye de dekerdo, tena eke ma sey cinîyan pêro pîya û bi awayêko rêxistinkerde têkoşîn bidê netîceyêko tesîrdar yeno girewtene.
Vera kulturê şîdetî ke heme kuncikê cuya komelkî de kodkerde yo, ma sey cinîyan hewceyê plan û projeyan ê ke rastkerdişê cuya rojane û têkilîyan ra heta ronayîşê sîstemanê cuya azade ya alternatîfe perspektîfêkê têkoşînî yo zafhetin bivirazê. Tam demêk de ke şîdet bîyo kultur û şeklê cuye, prosesê entegrasyonê demokratîkî ke Rayber Apoyî dayo destpêkerdene hetêk ra heme şar û binkewteyan têkilîyêk de ano têhet, heto bîn ra sere de cinî heme binkewteyan rê asoyêko newe yê têkoşînî akeno.
Bi averşîyayîşê Prosesê Haştî û Demokrasî xetê ma yê azadîya cinîyan û tumê cuya alternatîfe do zaf pêtêr aver şêrê. Yew ê hedefanê tewr bingeyinan ê Prosesê Haştî û Komelê Demokratîkî zî no yo ke do verê beşdarîya demokratîke û azade ya cinîyan akero. Bi saya nê prosesî sere de şîdetê vera cinîyan, vera heme nêzdîbîyayîşanê ke cuye de cinîyan kenê ê bînî û kenê obje, do bingeyê têkoşînêkê hîna hîra û xorînî awan bibê. Coka Prosesê Demokrasî û Haştî eynî wext de do bibo prosesêk ke demê azadîya cinîyan, fehmê azadîya cinîyan û heqanê bingeyinan ê merdimîye yê cinîyan her warê cuye de aver bero.
Ma emser 25ê Teşrîna Peyêne Roja Têkoşînê Mîyanneteweyî yê Vera Şîdetê Vera Cinîyan bi perspektîfêko newe, hîra û xorîn pêşwazî kenê. Ma sey cinîyan Kurdîstan de, Rojhelatê Mîyanênî de û dinya de bi pêtkerdişê yewîya cinîyan û berzkerdişê têkoşînê hemparî yê cinîyan cewab danê. Ma 25ê Teşrîna Peyêne her serre ra pêtêr bikerê hemparî, yewîye û têkoşînê cinîyan.
Raştîya 25ê Teşrîna Peyêne her çî ra ver ma têgêrayîşanê cinîyan rê wezîfe û berpirsîyarîya demokratîkkerdişê komelî bi aqilê cinîyan û pêşengîya cinîyan dana. Coka sere de komunarê cinî, her gama xo de ganî rêxistinbîyayîşê xo aver berê û gird bikerê, sey rayîrşîyayîşê azadîye bi serkewtiş biresnê şaristan, dew, kuçe, tax, fabrîka, mekteb, keye û kesan. Sîstemê camêrdserdestî ke gorkendoxê komel û cinîyan o, asta global, herêmkî û cayî de bi awayêko stratejîk û polîtîk nêzdî beno. Eke o naye her deqîqeya cuye de bi awayêko zafhetin ano ca, ma zî sey têgêrayîşanê cinîyan ganî her ca de û her deqîqe de bingeyê stratejî û polîtîkaya azadîya cinîyan ser o têkoşînêko zafhetin bidê.
Bi têkoşîn, rêxistinbîyayîş û qewetê xopawitişî ma çend dinyaya manaya xo gird bikerê, ma eşkenê estbîyayîşê xo aver berê. Nê bingeyî ser o ma eşkenê komelî û camêrdî bibedilnê û dinyayêk bivirazê ke tede boy yena girewtene. Û wina tradîsyonê 25ê Teşrîna Peyêne Roja Têkoşînê Vera Şîdetê Vera Cinîyan ke wayûbirayanê Mirabalan ra dest pêkeno û reseno Sakîne Cansizan, do beranê dinyayêka bêşîdete akero.
Seba ke ma cinîyanê ke bingeyê azadî, seypêyî û edaletî ser o têkoşîn danê reyde tumê cuyêka newîye bikerê û şîdetî ra bivîyarê, ma bi sloganê ‘BI RÊXISTINBÎYAYÎŞÊ CINÎYAN Ê VERA ŞÎDETÎ NIKA WEXTÊ XOPAWITIŞÎ YO!’ têkoşînê xo yê cinîyan o rêxistinkerde û hempar berz bikerê. 25ê Teşrîna Peyêne Roja Têkoşînê Mîyanneteweyî yê Vera Şîdetê Vera Cinîyan de ma bibê yew veng û yew zerrî û seserra 21. bikerê demê azadbîyayîşê cinîyan.
Wa têkoşînê ma yê cinîyan ê bi hezaran serran biciwîyo!
Wa konfederalîzmê cinîyan ê dinya biciwîyo!
Jin, jiyan, azadî!
Wa Mîmarê Azadî û Haştî Rayber Apo biciwîyo!”
