Dayîkanê Aştîye ke 24 bajaranê Vakurê Kurdîstanî û Tirkîya ra Ankara de nobete gênê, dîyar kerd ke ê dejanê xo yê ciwîyayeyan reyde zî aştî wazenê û îqtîdarî ra waşt ke gamanê şênberan bierzo.
Meclîsê Dayîkanê Aştîye bi waştişê azadîya fîzîkî ya Rayberê Şarê Kurdan Abdullah Ocalanî û eştişê gamanê şênberan ê seba Prosesê Aştîye û Komelê Demokratîkî 24 bajaranê Vakurê Kurdîstanî û Tirkîya ra rîyê xo çarna Ankara. Dayîkanê Aştîye ke Parka Meclîsî de ameyî têhet, uca de eşkerayî daye, îqtîdarî ra waşt ke gamanê hewceyan bierzo û waştişê xo ardî ziwan. Badê eşkerayîye dayîkî şîyî Parka Kurtuluşî, uca de çadir rona û dest bi nobete kerd. Dayîkanê Aştîye ke tîya de heta şefeqî çadir de nobete girewte, bi deyîr û berzkerdişê sloganan waştişê xo ardî ziwan.
Endamê Meclîsê Dayîkanê Aştîye ajansê ma rê qisey kerd û dayîkan dîyar kerd ke dejê xo reyde zî rîyê xo çarnayo Ankara û aştî wazenê û vat ke ê seba ke zerrîya tu dayîke nêveşo ameyê Ankara û venga dayîkanê leşker û polîsan da ke ê zî piştî bidê aştî. Sewbîna dayîkan dîyar kerd ke waştişê înan o sereke azadîya fîzîkî ya Rayberê Şarê Kurdan Abdullah Ocalanî ya û venga berpirsîyaran da ke gamanê şênberan bierzê.
